Քաղաքականություն
10.04.2025 | 16:20
Ադրբեջանի փոխվարչապետ Շահին Մուստաֆաևն ու Իրանի ճանապարհների և քաղաքաշինության նախարար Ֆարզանե Սադեղն այցելել են Արցախի Կովսական (Զանգիլան)։ Ադրբեջանական լրատվամիջոցների հաղորդմամբ՝ նրանք ստուգել են համատեղ իրականացվող ենթակառուցվածքային նախագծերը, այդ թվում՝ Աղբենդ կամրջի և Հորադիզ-Ագբենդ երկաթուղու շինարարությունը։
Այցի ընթացքում քննարկվել են Աղբենդ կամուրջը 2026 թվականի սկզբին շահագործման հանձնելու և դրա շահագործումը պարզեցնելու ծրագրերը։ Որոշվել է, որ սահմանին կամրջի շինարարությունը պետք է ավարտվի և բացման պատրաստ լինի մինչև այս տարվա նոյեմբեր։
Պայմանավորվածություն է ձեռք բերվել նաև անհրաժեշտ միջոցներ ձեռնարկել Իրանի տարածքում գտնվող սահմանային տերմինալի ժամանակավոր շահագործման համար և տերմինալը լրիվ հզորությամբ շահագործման հանձնել մինչև 2026 թվականը։
Բացի այդ, նախատեսվում է մինչև այս տարեվերջ վերականգնել ինչպես բեռնատար, այնպես էլ ուղևորատար տրանսպորտի շարժը։
Թարգմանությունը՝ Էմմա Չոբանյանի
