08.09.2026 | 21:50
Գագիկ Խաչատրյանի միլիարդները մի բանակի ունեցվածք է․ ՀՀ-ի դեմ մեծ հանցագործություն է տեղի ունեցել․ Գուրգեն Սիմոնյան. ՏԵՍԱՆՅՈՒԹ
ԱՄՆ-ը և ՌԴ-ն բանտարկյալների են փոխանակել Աբու Դաբիում․ Մոսկվան ազատ է արձակել 12 տարվա ազատազրկման դատապարտված Քսենիա Կարելինային․ WSJ
Քաղաքականություն
10.04.2025 | 13:30
Ռուսաստանը և ԱՄՆ-ն այսօր վաղ առավոտյան Աբու Դաբիում բանտարկյալների փոխանակում են իրականացրել՝ որպես վստահության շարունակական ամրապնդման նշան, քանի որ երկու կողմերը ձգտում են համաձայնության գալ Ուկրաինայում պատերազմը դադարեցնելու հարցում։ Այս մասին գրում է The Wall Street Journal-ը՝ վկայակոչելով իր աղբյուրներին։
Հաղորդվում է, որ ՌԴ-ն ազատ է արձակել ԱՄՆ քաղաքացի Քսենիա Կարելինային, որը դատապարտվել էր 12 տարվա ազատազրկման՝ ուկրաինացիներին օգնող բարեգործական կազմակերպությանը 51,80 դոլար նվիրաբերելու համար։ Նա դատապարտվել է պետական դավաճանության մեղադրանքով։
Ի պատասխան՝ ԱՄՆ-ն ազատ է արձակել Գերմանիայի և Ռուսաստանի քաղաքացի Արթուր Պետրովին, որը 2023 թվականին ձերբակալվել էր Կիպրոսում Միացյալ Նահանգների խնդրանքով՝ միկրոէլեկտրոնիկայի ենթադրյալ արտահանման համար։
Լրատվամիջոցի տվյայլներով՝ փոխանակման բանակցությունները վարել է ԿՀՎ տնօրեն Ջոն Ռեթքլիֆը։ Մասնավորապես, նա մի քանի անգամ հեռախոսազրույց է ունեցել ՌԴ ԱԴԾ տնօրեն Ալեքսանդր Բորտնիկովի և Ռուսաստանի արտաքին հետախուզության ծառայության ղեկավար Սերգեյ Նարիշկինի հետ։
Ռեթֆլիֆն անձամբ ներկա է եղել Աբու Դաբիի օդանավակայանում տեղի ունեցած փոխանակմանը։
«Այսօր նախագահ Թրամփը Ռուսաստանից տուն բերեց ևս մեկ անօրինական կերպով բանտարկված ամերիկացու։ Ես հպարտ եմ ԿՀՎ-ի սպաներով, որոնք անխոնջ աշխատել են այս ջանքերին աջակցելու համար, և մենք շնորհակալ ենք ԱՄԷ կառավարությանը՝ այս փոխանակումը հնարավոր դարձնելու համար»,- ԿՀՎ ղեկավարի խոսքերն է մեջբերում WSJ-ն։
ԱՄՆ պետքարտուղար Մարկո Ռուբիոն հաստատել է, որ փոխանակում է տեղի ունեցել։
«Քսենիա Կարելինան ինքնաթիռով վերադառնում է ԱՄՆ։ Նա անօրինական կերպով մեկ տարուց ավելի ձերբակալված էր Ռուսաստանի կողմից, և նախագահ Թրամփը ապահովեց նրա ազատ արձակումը։ Նա կշարունակի աշխատել ԲՈԼՈՐ ամերիկացիների ազատ արձակման համար»,- գրել է Ռուբիոն X-ի իր միկրոբլոգում։
Թարգմանությունը՝ Էմմա Չոբանյանի
