25.05.2026 | 00:01
Մայիսի 25-ի վաղ առավոտյան ՀՀ ԶՈւ ավիացիան Երևանի կենտրոնում կատարելու է թռիչք․ ՊՆ
Թրամփը հայտարարել է ավելի քան 75 երկրների համար մաքսատուրքերի բարձրացումը կասեցնելու մասին․ Չինաստանի համար դրանք հասել են 125%-ի
Քաղաքականություն
10.04.2025 | 11:51
ԱՄՆ նախագահ Դոնալդ Թրամփը հայտարարել է չինական ապրանքների մաքսատուրքերը 104-ից մինչև 125 տոկոսի բարձրացնելու մասին։ Այս մասին նա գրել է իր Truth Social սոցցանցում։
«Հիմնվելով Չինաստանի կողմից համաշխարհային շուկաների նկատմամբ ցուցաբերած անհարգալից վերաբերմունքի վրա՝ ես սույնով բարձրացնում եմ ԱՄՆ-ի կողմից Չինաստանից գանձվող մաքսատուրքը մինչև 125 տոկոսի, որն ուժի մեջ է մտնում անմիջապես։ Մոտ ապագայում Չինաստանը կհասկանա, որ ԱՄՆ-ից և այլ երկրներից գողանալու օրերն այլևս հանդուրժելի կամ ընդունելի չեն»,- նշել է Թրամփը։
Նա նաև հայտարարել է, որ մի շարք երկրների նկատմամբ ԱՄՆ-ի մաքսատուրքերը 90 օրով կասեցվում են։
«Հիմնվելով այն փաստի վրա, որ ավելի քան 75 երկիր զանգահարել են Միացյալ Նահանգների ներկայացուցիչներին, այդ թվում՝ Առևտրի նախարարությանը, Ֆինանսների նախարարությանը և ԱՄՆ առևտրային ներկայացուցչին, բանակցել առևտրի, առևտրային արգելքների, սակագների, արժութային մանիպուլյացիաների և ոչ դրամական սակագների վերաբերյալ քննարկվող հարցերի լուծման շուրջ, և որ այս երկրները, իմ խնդրանքով, որևէ հակադարձ միջոցներ չեն ձեռնարկել Միացյալ Նահանգների դեմ, ես թույլատրել եմ 90-օրյա դադար և այդ ժամանակահատվածում զգալիորեն նվազեցված փոխադարձ 10 տոկոս մաքսատուրք, որը նույնպես ուժի մեջ է մտնում անմիջապես»,- գրել է ԱՄՆ նախագահը։
Ավելի ուշ Թրամփը լրագրողների հետ զրույցում պաշտպանել է իր որոշումը՝ կտրուկ դադարեցնելու մաքսատուրքերի մեծ մասը դրանց ուժի մեջ մտնելուց ընդամենը մի քանի ժամ անց։
«Ես կարծում էի, որ մարդիկ մի փոքր չափազանցնում են։ Նրանք սկսեցին մի փոքր վախենալ»,- նշել է նա։
Հարցին՝ ինչո՞ւ է որոշել փոխել միտքը, չնայած երեկ ընդգծել էր, որ չի պատրաստվում ո՛չ հետաձգել, ո՛չ էլ չեղարկել ներմուծվող ապրանքների մաքսատուրքերի բարձրացումը, Թրամփը պատասխանել է․ «Պետք է ճկունություն ցուցաբերել»։
Ավելի վաղ Չինաստանը հայտարարել էր, որ ապրիլի 10-ից կբարձրացնի ամերիկյան բոլոր ապրանքների մաքսատուրքերը մինչև 84%։
Թարգմանությունը՝ Էմմա Չոբանյանի
