Թրամփը 500 մլն դոլար է կորցրել իր իսկ սահմանած պատժամիջոցների պատճառով

ԱՄՆ նախագահ Դոնալդ Թրամփի կարողությունը իր իսկ սահմանած ներմուծման մաքսատուրքերի պատճառով նվազել է 500 միլիոն դոլարով։ Նման հաշվարկ են ներկայացրել Forbes-ի լրագրողները, փոխանցում է DW-ի ռուսական ծառայությունը։

Լրատվամիջոցը նշում է, որ մաքսատուրքերի բարձրացման օրը՝ ապրիլի 2-ին, Թրամփի կարողությունը գնահատվում էր 4,7 միլիարդ դոլար, մեկ շաբաթ չանցած այն նվազել է մինչև 4,2 միլիարդ դոլարի։

Սպիտակ տան ղեկավարը կորցրել է մոտ 170 մլն դոլար՝ Trump Media and Technology Group-ի բաժնետոմսերի արժեքի անկման պատճառով։ Վերջին երեք օրերի ընթացքում դրանք արժեզրկվել են 8%-ով:

Մյուս կորուստները կապված են կոմերցիոն անշարժ գույքի (90 մլն), գոլֆի բիզնեսի (մոտ 70 մլն), հյուրանոցային և առողջարանային բիզնեսի (65 մլն), կրիպտոարժույթի և այլ ոլորտների հետ, որտեղ Թրամփը բիզնես կամ ներդրումներ է ունեցել։

Մաքսատուրքերից տուժել է նաև Թրամփի աջակից, ամերիկացի միլիարդատեր Իլոն Մասկը։ Ըստ Business Insider-ի՝ Space X-ի ղեկավարի կարողությունն ապրիլի 2-ից նվազել է 35 միլիարդ դոլարով, ապրիլի 8-ին այն գնահատվել է 298 միլիարդ դոլար (ըստ Bloomberg-ի՝ ապրիլի 9-ի դրությամբ՝ արդեն 290 միլիարդ դոլար): Bloomberg Billionaires Index-ի համաձայն՝ աշխարհի 10 ամենահարուստ մարդիկ արժեթղթերի շուկայի անկման երեք օրերի ընթացքում կորցրել են 172 միլիարդ դոլար։

Ավելի վաղ էլ WP-ն հայտնել էր, որ Մասկն անձամբ փորձել է համոզել Թրամփին չեղարկել մաքսատուրքերը։

Թարգմանությունը՝ Էմմա Չոբանյանի