05.04.2026 | 21:21
Բախվել են VAZ և KIA մակնիշների ավտոմեքենաները․ կան տուժածներ և զոհ
Իլոն Մասկն անձամբ փորձել է համոզել Թրամփին չեղարկել մաքսատուրքերը․ The Washington Post
Քաղաքականություն
08.04.2025 | 20:14
Ամերիկացի միլիարդատեր Իլոն Մասկն անձամբ է փորձել համոզել ԱՄՆ նախագահ Դոնալդ Թրամփին մեղմացնել իր դիրքորոշումը առևտրային մաքսատուրքերի նկատմամբ։ Այս մասին հայտնում է The Washington Post-ը՝ հղում անելով աղբյուրներին։
Հանգստյան օրերին Մասկը մի քանի հաղորդագրություն է հրապարակել X սոցցանցում՝ քննադատելով Թրամփի առևտրային քաղաքականության խորհրդական և մաքսատուրքերի կողմնակից Փիթեր Նավարոյին: Լրատվամիջոցի տվյալներով՝ Մասկը նաև ուղիղ դիմել է Թրամփին, սակայն այդ բանակցությունները հաջողությամբ չեն ավարտվել։ Նախօրեին ԱՄՆ նախագահը սպառնացել էր Չինաստանից ապրանքների համար լրացուցիչ 50 տոկոս մաքսատուրք մտցնել, եթե Չինաստանը չչեղարկի Վաշինգտոնի մաքսատուրքերի նկատմամբ սահմանված պատասխան միջոցները։
Մասկը նաև հրապարակել է Նոբելյան մրցանակակիր, տնտեսագետ Միլթոն Ֆրիդմանի տեսանյութը՝ բացատրելով ազատ շուկաների կարևորությունը:
The Washington Post-ը նշում է, որ մաքսատուրքերի վերաբերյալ Թրամփի և Մասկի դիրքորոշումների տարբերությունները մինչ օրս նախագահի և նրա խորհրդականի միջև ամենանշանակալի հակամարտությունն են։ Լրատվամիջոցը հիշեցնում է, որ Մասկը դեմ է եղել առևտրային մաքսատուրքերին Թրամփի առաջին նախագահության ժամանակ, երբ Tesla-ն փորձում էր դատարանում վիճարկել Չինաստանից ավտոմեքենաների ներմուծման մաքսատուրքերը։
Լրատվամիջոցի աղբյուրներն ասել են, որ գործարարներից շատերը, որոնք նախընտրական քարոզարշավի ժամանակ պաշտպանել են Թրամփի թեկնածությունը, «ապշել են» ԱՄՆ նախագահի՝ նման բարձր մաքսատուրքեր սահմանելու որոշումից։
Ըստ WP-ի տեղեկությունների՝ Թրամփի կողմնակիցներից մի խումբ գործարարներ սկսել են աշխատել ոչ ֆորմալ խմբի ստեղծման վրա, որը լոբբինգ կկատարի ավելի չափավոր առևտրային քաղաքականության համար։
Թարգմանությունը՝ Էմմա Չոբանյանի
