Ինչ կտա Starlink-ը ՀՀ անվտանգությանը. ՏԵՍԱՆՅՈՒԹ

Վարչապետ Նիկոլ Փաշինյանը վաղ առավոտյան շտապեց հայտնել, որ Starlink արբանյակային ինտերնետը հասանելի է Հայաստանում։ 

«Starlink-ի բաժանորդները կարող են իրենց աշխատանքը կազմակերպել Հայաստանի Հանրապետության ողջ տարածքում, բնության գրկում, սարերում, դաշտերում, անտառներում՝ մնալով անմիջական կապի մեջ աշխարհի և բնության հետ»,- գրել է Փաշինյանը։

Բայց նա ուրախալի լուրը հապշտապ հայտնելուց, կարծես, մոռացել է նշել, որ Հայաստանում Starlink-ի ծառայության ամսական բաժանորդագրության արժեքը սկսվում է 18,000 դրամից, սարքավորումների արժեքը կազմում է 349 դոլար։ Մեդիափորձագետ Սամվել Մարտիրոսյանի խոսքով՝ Starlink-ը մրցակից չէ հասարակ ինտերնետ կապին և ծառայությունն ավելի թանկարժեք է։

​Starlink-ն արբանյակային ինտերնետային ծառայություն է, որը մշակել է ամերիկացի միլիարդատեր Իլոն Մասկին պատկանող SpaceX ընկերությունը՝ նպատակ ունենալով ապահովել բարձր արագության ինտերնետ հասանելիություն ամբողջ աշխարհում, հատկապես, այն վայրերում, որտեղ ավանդական ինտերնետ կապը սահմանափակ է կամ բացակայում է։ Ծառայությունը հիմնված է ցածր ուղեծրում գտնվող հազարավոր փոքր արբանյակների ցանցի վրա, որոնք ապահովում են ինտերնետ կապի լայնածավալ ծածկույթ։ ​Starlink-ը լավ լուծում է հատկապես անվտանգային տեսանկյունից։

«Երբ կապուղիները վնասվեն, նաև բանակի համար լուրջ օգնություն է, ռուս-ուկրաինական պատերազմը ցույց է տալիս, որ ​Starlink-ն  առաջնագծում շատ մեծ հնարավորություններ է տալիս ուկրաինական բանակին»,- նշեց Սամվել Մարտիրոսյանը։

Միլիարդատեր, SpaceX-ի հիմնադիր, ԱՄՆ Կառավարության արդյունավետության դեպարտամենտի ղեկավար Իլոն Մասկը ևս հայտարարել է, որ Starlink-ն այժմ ակտիվ է Հայաստանում՝ դարձնելով այն 130-րդ երկիրը, որտեղ հասանելի է այս ծառայությունը։ ​ 

​Starlink-ի քարտեզի վրա արդեն կա Հայաստանի անունը․ հարևան երկրներից ծառայությունը 2023 թվականից հասանելի էր Վրաստանում։ Տարածաշրջանային որևէ այլ երկրում արբանյակային ինտերնետ կապի այս ծառայությունն առայժմ հասանելի չէ։   

Մանրամասները՝ տեսանյութում։

Արփի Հակոբյան