«Մեծ-մեծ խոսում է, իրա ժամանակ թոշակը հավասա՞ր էր պարենային զամբյուղին»․ Եղոյանը՝ Վարդանյանին․ ՏԵՍԱՆՅՈՒԹ

ԱԺ նիստում քննարկվում է «Հայաստան» խմբակցության հեղինակած՝ «Պետական կենսաթոշակների մասին» օրենքում լրացումներ կատարելու մասին օրենքի նախագիծն առաջին ընթերցմամբ ընդունելու մասին հարցը:

«Հայաստան» խմբակցությունը նախաձեռնել է օրենքի նախագիծ, համաձայն որի՝ առաջարկում է 2026 թվականի հունվարի 1-ից նվազագույն կենսաթոշակի չափը սահմանել այնպես, որ այն պակաս չլինի պարենային զամբյուղի ամսական արժեքից, իսկ միջին աշխատանքային կենսաթոշակի չափը պակաս չլինի սպառողական զամբյուղի ամսական արժեքից:

ՔՊ պատգամավոր Արման Եղոյանն իր ելույթում խոսեց ըննդիմության ներկայացրած նախագծի մասին՝ ընդգծելով․ «2018 թվականին նվազագույն կենսաթոշակը 16,800 դրամից բարձրացվել է ու այսօր հասել է 36,000 դրամի, այսինքն՝ 7 տարում մոտ 20,000 դրամով նվազագույն կենսաթոշակը բարձրացել է: Սա տարեկան անում է 150 միլիարդ դրամ, որովհետև Հայաստանում կա 650 հազար թոշակառու, այսինքն՝ 380 մլն դոլար: ՀՀ-ն հիմա տարեկան 380 մլն դոլարով ավելի շատ թոշակ է տալիս իր քաղաքացիներին, քան տալիս էր 2018 թվականին»։

Պատգամավորի դիտարկմամբ՝ կենսաթոշակը բարձրացնելու համար պետք է արտադրողականությունը բարձրացնել, ՀՆԱ-ն ավելացնել։ Եղոյանը պատասխանեց նաև ընդդիմության քննադատություններին։

«Ձեր սոցապ նախարարն է նստած, եկել, մեծ- մեծ խոսում է, իրա ժամանակ թոշակը հավասա՞ր էր պարենային զամբյուղին։ Պարոն Աղվան Վարդանյանը սոցապ նախարար էր, իրա ժամանակ թոշակը հավասա՞ր էր պարենային զամբյուղին։ Հիմա հավասար է, կամ համադրելի է»,- ասաց Եղոյանը։

Մանրամասները՝ տեսանյութում։