19.02.2026 | 21:27
Երևանի 3 վարչական շրջանում փոշու պարունակությունը գերազանցել է սահմանային թույլատրելի կոնցենտրացիան
ԵՄ ԱԳ նախարարները չեն կարողացել համաձայնության գալ Ուկրաինային 40 միլիարդ եվրոյի օգնության նոր փաթեթի շուրջ
Քաղաքականություն
18.03.2025 | 13:05
Բրյուսելում կայացած հանդիպմանը Եվրամիության արտաքին գործերի նախարարները չեն կարողացել համաձայնության գալ Ուկրաինային 40 միլիարդ եվրո արժողությամբ օգնության նոր փաթեթի շուրջ։ Այս մասին ԵՄ խորհրդի նիստից հետո հայտարարել է արտաքին գործերի և անվտանգության քաղաքականության հարցերով եվրահանձնակատար Կայա Կալլասը, գրում է DW-ի ռուսական ծառայությունը։
Նրա խոսքով՝ ԵՄ երկրների միջև կա լայն քաղաքական աջակցություն Ուկրաինային նոր օգնություն տրամադրելու հարցում, սակայն կան շատ մանրուքներ, որոնք անհրաժեշտ է մշակել։ Կալլասը հավելել է, որ հույս ունեն մոտ ապագայում այս հարցում առաջընթաց գրանցել։
Ավելի վաղ Կալլասը հանդես էր եկել Ուկրաինային 20-ից 40 միլիարդ եվրո արժողությամբ ռազմական օգնության նոր փաթեթ տրամադրելու նախաձեռնությամբ, որի պետք է ներառեր 2025 թվականին հակաօդային պաշտպանության համակարգերի և հրթիռների մատակարարումներ, ինչպես նաև ուկրաինական ռազմական բրիգադների վերապատրաստում և սարքավորումներ: Բացի այդ, նախատեսվում է շուրջ 5 մլրդ եվրո արժողությամբ 2 մլն հրետանային արկերի մատակարարում։
«20 միլիարդն այն գումարն է, որը Եվրամիությունը հատկացրել է Ուկրաինային 2024 թվականին, 40 միլիարդը ծածկելու է ԱՄՆ-ի օգնությունից պոտենցիալ մերժումը, որը 2024 թվականին հատկացրել է 16 միլիարդ»,- ասել է եվրոպացի դիվանագետներից մեկը։
Հավելենք, որ այս օգնության փաթեթի առաջին տարբերակը Հունգարիան արգելափակել էր մարտի սկզբին, որից հետո ԵՄ-ն առաջարկել էր կամավորության հիմունքով հիմնադրամ ստեղծել՝ Ուկրաինային ռազմական օգնության համար։
Թարգմանությունը՝ Էմմա Չոբանյանի
