Փաշինյանը Ալիևի պահանջով Երասխից տեղափոխված մետաղաձուլարան է այցելել

Նիկոլ Փաշինյանն այսօր այցելել է Արարատ խոշորացված համայնքի մետաղաձուլարան։ Վարչապետը ֆեյսբուքյան էջում տեսանյութ է հրապարակել և գրել. «Արարատ խոշորացված համայնքի աղմկահարույց մետաղաձուլարանն արդեն աշխատում է»,-հայտնել է նա և ընդգծել #ինչպեսխոստացելէի հեշթեգը։

Հիշեցնենք, որ խոսքը Երասխում կառուցվող 70 մլն դոլար ներդրմամբ հայ-ամերիկյան մետալուրգիական գործարանի մասին է, որի հետ կապված իշխանության ներկայացուցիչները հայտնում էին, թե գործարանում տարեկան 180 հազար տոննա արտադրանք է թողարկվելու, 1000-ավոր աշխատատեղեր են բացվելու։

Նշենք, որ Ադրբեջանը պարբերաբար կրակում էր գործարանի ուղղությամբ՝ պահանջելով դադարեցնել շինաշխատանքները։ ՀՀ շրջակա միջավայրի նախարարությունը հակադարձում էր՝ Երասխի գործարանի շինաշխատանքները դադարեցնելու Ադրբեջանի պահանջի համար որևէ հիմք առկա չէ։ 2023 թվականի հունիսի 14-ին Ադրբեջանի զինուժը կրակ էր բացել Երասխում օտարերկրյա ներդրումների միջոցով կառուցվող մետալուրգիական գործարանի ուղղությամբ, ինչի հետևանքով վիրավորում է ստացել օտարերկրյա երկու քաղաքացի։ Նույն թվականի սեպտեմբերին հայտնի դարձավ, որ գործարանը տեղափոխվում է այլ վայր։ Այն կառուցվեց և այժմ գործունեությունը ծավալում է Արարատի այլ բնակավայրում՝ Երասխից 20 կմ հեռավորության վրա։ 2024 թվականի հունվարին Կառավարությունը որոշեց գործարանը կառուցող GTB Still ընկերությանը 3,5 միլիարդ դրամի բյուջետային վարկ տրամադրել 4 տարվա ժամկետով։ Այս ընկերությունում 50 տոկոս մասնակցություն ունի Նոնո Արմենի Սարգսյանը՝ Վազգեն Սարգսյանի զարմուհին, նույնքան էլ՝ ԱՄՆ քաղաքացի Բոբբի Սինգհ Կանգը։