16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Հայկական ձուկը՝ ԵՄ արտահանման ճանապարհին․ ինչ խնդիրներ կարող են լինել
Տնտեսություն
13.03.2025 | 14:51
8 տարի տևած բանակցություններից հետո Հայաստանն իրավունք է ստացել մարտի 16-ից ձուկ ու ձկնամթերք արտահանել Եվրոպական միության շուկա․ այս մասին հրավիրված մամուլի ասուլիսի ժամանակ տեղեկացրեց Սննդամթերքի անվտանգության տեսչական մարմնի ղեկավարի տեղակալ Տիգրան Պետրոսյանը։
«Արտահանողները պարտադիր պետք է գրանցված լինեն ԵՄ արտահանման համապատասխան համակարգում։ Եվրոպական կողմը տալիս է արտահանման նախնական թույլտվության հայտ, և դիմում է մեզ։ Այդ գործընթացին հաջորդում է այն, թե ինչ չափորոշիչներով պետք է արտահանման ենթակա ձկնամթերքը լաբորատոր հետազոտության ենթարկվի։ Լաբորատոր փորձաքննություններն իրականացվում են, տալիս ենք սերտիֆիկատներ»,- մանրամասնեց ՍԱՏՄ պաշտոնյան։
Տիգրան Պետրոսյանը դժվարացավ թվարկել ԵՄ-ի առաջարկած բոլոր պահանջները, բայց նշեց, որ չափորոշիչները վերաբերում են նաև կերին։
Էկոնոմիկայի նախարարության անասնաբուծության վարչության պետ Տիգրան Ալեքսանյանի խոսքով՝ հատկապես վերջին տարիներին հանրապետությունում ձկնաբուծության ոլորտը զարգացել է։ Ալեքսանյանն ընդգծեց, որ շատ ձկնաբուծական տնտեսություններ արտադրությունն իրականացնում են բարձր տեխնոլոգիաներով, որը հնարավորություն է տալիս բարձր որակի ձուկ և ձկնամթերք արտադրել։ Նա հայտնեց, որ նախորդ տարի արտադրվել է շուրջ 27 հազար տոննա ձուկ և ձկնամթերք, որը 2023-ի ցուցանիշից ավելի է 4-5 տոկոսով։
«Հայաստանի ձկնաբույծների միություն» հասարակական կազմակերպության տնօրեն Գոռ Գրիգորյանն էլ շեշտեց, որ հայկական ձուկն արտահանվում է նաև Ռուսաստանի Դաշնություն, Արաբական միացյալ Էմիրություններ և այլ երկրներ։ Նա նշեց, որ այդ երկրներն էլ արտահանման հստակ պահանջներ են սահմանում, որոնց համապատասխանում է հայկական արտադրանքը։ Գրիգորյանի կարծիքով՝ դեռ շատ անելիքներ կան Եվրոպական շուկա մուտք գործելու համար։
«Նախ պետք է եվրոպական շուկան ուսումնասիրել, հասկանալ տվյալ պահանջները։ ԵՄ շուկան բարդ է ոչ միայն իր չափանիշներով, այլև այնտեղ մեզ սպասում է մրցակցություն։ Եվրոպական երկրներից Դանիան, Նորվեգիան, Բելգիան հայտնի են իրենց ձկնաբուծությամբ, շուկայի 80 տոկոսն այդ երկրների արտադրանքն է»,- նկատեց ձկնաբուծության միության ղեկավարը։
Ըստ Գոռ Գրիգորյանի՝ հայկական ձկնամթերքը ԵՄ շուկայում նաև գնային մրցակցության խնդրին է բախվելու։ Նրա դիտարկմամբ՝ եթե արտահանումը օդային բեռնափոխադրմամբ իրականացվի, ապա ավելանալու են նաև ծախսերը, հետևաբար, դա չի կարող չազդել արժեքի վրա։
Մանյա Պողոսյան
