30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
ԱԳՆ-ն 9 մեքենա կտրամադրի օտարերկրյա պետություններում ՀՀ դիվանագիտական մարմիններին
13.03.2025 | 12:36
ՀՀ վարչապետ Նիկոլ Փաշինյանի որոշմամբ արտաքին գործերի նախարարության տրանսպորտային միջոցներից 9-ը կամրացվի նախարարությանը ենթակա օտարերկրյա պետություններում դիվանագիտական ծառայության մարմիններին։ Կառավարության նիստի օրակարգում այս հարցն ընդգրկված է չզեկուցվող հարցերի փաթեթում։
Որոշման մեջ նշվում է, որ ԱԳՆ-ի հաշվեկշռում հաշվառված է 15 մեքենա, որոնցից 14-ը Փաշինյանի հանձնարությամբ ենթակա է կրճատման:
«Հաշվի առնելով 2025-2026 թթ. պետական բյուջեի միջնաժամկետ ծրագրերի մեջ ներառված օտարերկրյա պետություններում ՀՀ դիվանագիտական ծառայության մարմիններում առկա հին և մաշված ավտոմեքենաների թարմացման գործընթացը, ինչպես նաև նախարարության հաշվեկշռում առկա կրճատվող մեքենաների ցանկում ընդգրկված նոր և տեխնիկապես լավ վիճակում գտնվող ավտոմեքենաները,վարչապետի հետ համաձայնեցված, նախարարությունը նախատեսում է տեղափոխել և օտարերկրյա պետություններում դիվանագիտական ծառայության մարմինների տնօրինմանը հանձնել նախարարության հաշվեկշռում առկա 9 տրանսպորտային միջոցները: Ավտոմեքենաները գտնվում են տեխնիկապես անթերի վիճակում: Անսարքություններ և կոսմետիկ խնդիրներ առկա չեն»,- նշված է հիմնավորման մեջ։
Ըստ կառավարության՝ ավտոմեքենաների տեղափոխումն օտարերկրյա պետություններում դիվանագիտական ծառայության մարմինների հաշվեկշռին հնարավորություն կտա տնտեսել էական ֆինանսական միջոցներ, ինչպես նաև կնպաստի օտարերկրյա պետություններում ՀՀ դիվանագիտական ծառայության մարմինների բնականոն աշխատանքի պատշաճ կազմակերպմանը:
Հիշեցնենք՝ նախորդ տարի Հանրային հեռուստաընկերությանը տված հարցազրույցում Նիկոլ Փաշինյանը հայտարարել էր, որ ծառայողական ավտոմեքենաների կրճատումն իրականացվելու է «կացնային» մոտեցմամբ՝ ի պատասխան գերատեսչությունների կողմից խնդիրը համակարգված ձևով լուծելը ձգձգելուն։
