30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Թուրքիան արգելափակել է Իսրայելի մասնակցությունը ՆԱՏՕ-ի զորավարժություններին
Քաղաքականություն
10.03.2025 | 16:31
Թուրքիան արգելափակել է Իսրայելի մասնակցությունը ՆԱՏՕ-ի ամենամյա զորավարժություններին՝ նվիրված «դիմացկունության և արտակարգ իրավիճակների պատրաստությանը»: Այս մասին հայտնում է Իսրայելի ԱԳՆ-ն՝ ըստ իր կողմից ստացված հաղորդումների, գրում է Ynet-ը։
Որոշումն ընդունվել է շուրջ երկու շաբաթ առաջ իսրայելցի դիվանագետների, ՆԱՏՕ-ի զորավարժությունների համակարգող խմբի և դաշինքում Բուլղարիայի պատվիրակության հանդիպումից հետո։ Հաղորդվում է, որ հանդիպման ժամանակ Իսրայելի մասնակցության հարցում մեծ խանդավառություն է եղել։
ՆԱՏՕ-ի որոշումները պահանջում են կոնսենսուս, և Թուրքիայի վետոն թույլ չի տա Իսրայելին մասնակցել դաշինքի պաշտոնական միջոցառումներին։ Իսրայելցի պաշտոնյան մեղադրել է Թուրքիային իր վետոյի իրավունքը որպես քաղաքական գործիք օգտագործելու մեջ։
«Թուրքիայի դիրքորոշումը խաթարում է տարածաշրջանային համագործակցությունը և գլոբալ մարտահրավերներին դիմակայելու՝ ՆԱՏՕ-ի կարողությունը։ Միասնությունն ու հավաքական անվտանգությունը խթանելու փոխարեն՝ Թուրքիան իր վետոն է կիրառում այնպես, որ վնաս է հասցնում ռազմավարական գործընկերությանը: ՆԱՏՕ-ի հետ Իսրայելի համագործակցության արգելափակումը չի նպաստում կայունությանը, ավելի շուտ խարխլում է դաշինքի հիմնական արժեքները»,- հայտարարել է իսրայելցի պաշտոնյաներից մեկը։
Գազայում պատերազմի սկսվելուց ի վեր Թուրքիան հետևողականորեն արգելափակելում է ՆԱՏՕ-Իսրայել համագործակցությունը՝ պնդելով, որ դաշինքը չպետք է համագործակցի Իսրայելի հետ մինչև հակամարտությունը չավարտվի: Ավելի վաղ էլ Անկարան անհաջող փորձեր էր արել՝ թույլ չտալ Իսրայելին ՆԱՏՕ-ում դիտորդի կարգավիճակ ստանալ, սակայն երկու երկրների միջև կարճատև դիվանագիտական հաշտեցումից հետո հրաժարվել էր այդ գաղափարից։
Թուրքիան վետո է դրել Իսրայելի հետ ՆԱՏՕ-ի բոլոր փոխգործակցությունների վրա, ներառյալ՝ հանդիպումներն ու համատեղ վարժանքները:
Անցյալ տարվա հուլիսին ՆԱՏՕ-ի գագաթնաժողովում Թուրքիայի նախագահ Ռեջեփ Թայիփ Էրդողանը հայտարարել էր, որ դաշինքը «չի կարող շարունակել իր գործընկերությունը Իսրայելի կառավարության հետ»։ Ի պատասխան՝ Իսրայելի այն ժամանակվա արտգործնախարար Իսրայել Կացը կոչ էր արել ՆԱՏՕ-ին վտարել Թուրքիային այն բանից հետո, երբ Էրդողանը ակնարկել էր Իսրայելի դեմ հնարավոր ռազմական գործողությունների մասին։
Թարգմանությունը՝ Էմմա Չոբանյանի
