19.12.2025 | 14:11
Քննարկվել են ՀՀ–ԱՄՆ տնտեսական և առևտրային համագործակցության խորացման հնարավորությունները
Կիևը ԱՄՆ-ի հետ բանակցություններում կառաջարկի ՌԴ-ի հետ մասնակի հրադադար․ ԶԼՄ-ներ
Քաղաքականություն
10.03.2025 | 12:55
Ուկրաինան մասնակի հրադադար է առաջարկելու Սաուդյան Արաբիայում մարտի 11-ին ԱՄՆ-ի հետ նախանշված հանդիպման ժամանակ։ Այս մասին հայտնում է The Financial Times-ը՝ վկայակոչելով պաշտոնյաներին։
Նշվում է, որ ուկրաինական կողմը բանակցությունների ընթացքում կփորձի համոզել ԱՄՆ-ին վերսկսել հետախուզական տեղեկատվության փոխանակումը և ռազմական օգնության մատակարարումը։ Այդ նպատակով Կիևը պատրաստ է Ռուսաստանին առաջարկել դադարեցնել անօդաչու թռչող սարքերով և հրթիռներով հեռահար հարվածներն ու ռազմական գործողությունները Սև ծովում: Ուկրաինացի պաշտոնյաներից մեկը FT-ին ասել է, որ Կիևն այժմ ցանկանում է բարելավել հարաբերություններն ԱՄՆ-ի հետ:
Եվրոպացի երկու պաշտոնյաներ ասել են, որ Ուկրաինայի իշխանությունները հրադադարի շուրջ բանակցություններում առաջընթացը կապում են ԱՄՆ-ի ռազմական և հետախուզական օգնության վերականգնման հետ:
Սպասվում է, որ մարտի 11-ին Սաուդյան Արաբիայի Ջիդդա քաղաքում կկայանա Ուկրաինայի և ԱՄՆ-ի ներկայացուցիչների հանդիպումը։ Ամերիկյան կողմից պատվիրակության կազմում լինելու են պետքարտուղար Մարկո Ռուբիոն, Ազգային անվտանգության հարցերով խորհրդական Մայք Ուոլցը և Մերձավոր Արևելքում Թրամփի բանագնաց Սթիվ Ուիթկոֆը։ Ուկրաինայի պատվիրակությունը կգլխավորի նախագահի գրասենյակի ղեկավար Անդրեյ Երմակը։
Reuters գործակալությունն էլ, վկայակոչելով երկու ամերիկացի պաշտոնյաների, գրում է, որ ամերիկյան կողմը բանակցություններում նախատեսում է պարզել՝ արդյո՞ք Կիևը պատրաստ է զիջումների գնալ պատերազմի դադարեցման համար։ Աղբյուրներից մեկն ասել է, որ ԱՄՆ պատվիրակությունը նաև «հետևելու է նշաններին, որ ուկրաինացիները լրջորեն են տրամադրված հարաբերությունները բարելավելու հարցում»՝ ԱՄՆ նախագահ Դոնալդ Թրամփի վարչակազմի հետ Սպիտակ տանը տեղի ունեցած վիճաբանությունից հետո։
«Չի կարելի ասել՝ «ես խաղաղություն եմ ուզում» և «ես հրաժարվում եմ փոխզիջումներից»»,- Reuters-ին ասել է ամերիկացի պաշտոնյան:
«Մենք ցանկանում ենք տեսնել՝ արդյո՞ք ուկրաինացիները շահագրգռված են ոչ միայն խաղաղությամբ, այլ իրատեսական խաղաղությամբ։ Եթե նրանց հետաքրքրում են միայն 2014 կամ 2022 թվականների սահմանները, դա ինչ-որ բան է ասում»,-ասել է մեկ այլ աղբյուր։
Թարգմանությունը՝ Էմմա Չոբանյանի
