12.12.2025 | 23:31
Պուտինի օգնականը չի բացառել պատերազմի ավարտից հետո Դոնբասի ապառազմականացումը
Քաղաքապետարանի պաշտոնյան ձերբակալվել է նախկին ձերբակալության վարույթի շրջանակում
Հասարակություն
04.03.2025 | 15:58
Երևանի քաղաքապետարանի աշխատակազմի կոմունալ տնտեսության վարչության պետ Արսեն Կարոյանը ձերբակալվել է Հակակոռուպցիոն կոմիտեում քննվող քրեական վարույթի շրջանակում: Այս մասին Factor.am-ի հարցին ի պատատասխան՝ ասաց Հակակոռուպցիոն կոմիտեի մամուլի խոսնակ Մարինա Օհանջանյանը:
Factor.am-ի տեղեկություններով՝ վարույթը վերաբերում է կաշառք ստանալուն, տալուն և օժանդակելուն: Մեր տեղեկություններով՝ Արսեն Կարոյանի ձերբակալությունը եղել է անաղմուկ. նրան հրավիրել են հարցաքննության և ձերբակալել:
Նշենք, որ Օհանջանյանի հիշատակած քրեական վարույթը վերաբերում է քաղաքապետարանում փետրվարի սկզբին տեղի ունեցած ձերբակալությանը: Այդ ժամանակ ձերբակալվել էին քաղաքալետարանի աշխատակազմի հասարակական կարգի պահպանության ծառայության պետ Արամ Գյուլզադյանը, 2018 թվականին Երևանի քաղաքապետարանի աշխատակազմի քաղաքաշինության և հողի վերահսկողության վարչության պետի պաշտոնը զբաղեցրած, փաստաբան Ռոբերտ Դարբինյանը և այդ ժամանակ նրա տեղակալի պաշտոնը զբաղեցնող Արամ Այվազյանը, նաև այլ ներկա և նախկին պաշտոնյաներ:
Այդ գործով, ըստ Հակակոռուպցիոն կոմիտեի, ավելի քան 10 մեղադրյալ կա: Մարինա Օհանջանյանը, սակայն, անուններ չի նշում:
Արսեն Կարոյանը քաղաքապետարանում պաշտոն էր զբաղեցնում 2020 թվականից, երբ քաղաքապետը Հայկ Մարությանն էր:
Արփի Հակոբյան
