18.12.2025 | 13:33
Արմեն Գրիգորյանն ու Վերնոն Քոքերը քննարկել են անվտանգության և պաշտպանության ոլորտներում համագործակցության ընդլայնումը
Ուկրաինայի հանածոների գործարքը մեռած չէ, բայց Զելենսկին «պետք է ավելի երախտապարտ լինի»․ Թրամփ
Քաղաքականություն
04.03.2025 | 12:09
ԱՄՆ նախագահ Դոնալդ Թրամփը հայտարարել է, որ ԱՄՆ-ի և Ուկրաինայի միջև առաջարկվող տնտեսական համաձայնագիրը դեռևս սեղանի վրա է, բայց նա պնդել է, որ Ուկրաինայի նախագահ Վլադիմիր Զելենսկին պետք է «ավելի շատ գնահատի» ԱՄՆ-ի աջակցությունը, գրում է The Hill-ը:
Պատասխանելով լրագրողների դիտարկմանը, թե հանածոների գործարքը մեռած է, Թրամփն ասել է․ «Ես այդպես չեմ կարծում։ Դա մեծ գործարք է մեզ համար, քանի որ Բայդենը, անկեղծ ասած, հիմարաբար 300 միլիարդ դոլար է տվել մի երկրի՝ կռվելու, փորձելու և ինչ-որ բաներ անելու համար: Իսկ գիտե՞ք՝ ինչ եղավ։ Մենք ոչինչ չենք ստանում»։
Հարցին՝ ի՞նչ պետք է աներ Զելենսկին բանակցությունները վերսկսելու համար, Թրամփը պատասխանել է, որ ուկրաինացի առաջնորդը պետք է ավելի շատ երախտագիտություն արտահայտի ԱՄՆ-ի օգնության համար:
«Ուղղակի կարծում եմ, որ նա պետք է ավելի երախտապարտ լինի, քանի որ այս երկիրը նրանց կողքին է կանգնել։ Մենք նրանց տվել ենք շատ ավելին, քան Եվրոպան։ Եվրոպան պետք է ավելին տար, քան մենք, քանի որ դա հենց այստեղ է», -հայտարարել է ԱՄՆ նախագահը։
Հիշեցնենք, որ ավելի վաղ Սպիտակ տան Օվալաձև աշխատասենյակում ԱՄՆ նախագահ Դոնալդ Թրամփի, Ուկրաինայի նախագահ Վլադիմիր Զելենսկիի, ինչպես նաև ԱՄՆ փոխնախագահ Ջեյ Դի Վենսի միջև թեժ բանավեճ է տեղի ունեցել, որի պատճառով հանածոների մասին համաձայնագիրը չի ստորագրվել։
Թարգմանությունը՝ Էմմա Չոբանյանի
