Թեժ բանավեճ Թրամփի և Զելենսկիի միջև Սպիտակ տանը հանդիպման ժամանակ․ ՏԵՍԱՆՅՈՒԹ

Սպիտակ տանը Օվալաձև աշխատասենյակում ԱՄՆ նախագահ Դոնալդ Թրամփի, Ուկրաինայի նախագահ Վլադիմիր Զելենսկիի, ինչպես նաև ԱՄՆ փոխնախագահ Ջեյ Դի Վենսի միջև թեժ բանավեճ է տեղի ունեցել, գրում է BBC-ի ռուսական ծառայությունը։

Վենսը Զելենսկիին մեղադրել է «անհարգանից» վերաբերմունքի համար, ինչից հետո Թրամփը հայտարարել է, որ Ուկրաինայի առաջնորդը «խաղում է Երրորդ համաշխարհային պատերազմի հետ»։

«Ինչ եք կարծում՝ հարգալի՞ց է մտնել Օվալաձև գրասենյակ և հարձակվել Սպիտակ տան վարչակազմի վրա, որը փորձում է կանխել ձեր երկրի կործանումը»,- հայտարարել է Վենսը։

Թրամփն իր հերթին նշել է․ «Դուք այս պահին լավ վիճակում չեք։ Դուք հիմա հաղթաթուղթ չունեք։ Մեզ հետ Դուք կունենաք հաղթաթուղթ: Դուք վտանգում եք միլիոնավոր մարդկանց կյանքը։ Դուք վտանգում եք նրանց երրորդ համաշխարհային պատերազմով»:

«Դուք պետք է երախտապարտ լինեք, ձեր ձեռքում քարտեր չկան, ձեր զորքերը սպառվում են», – ասել է Թրամփը՝ պնդելով հրադադարի անհրաժեշտությունը։

Ի պատասխան՝ Վլադիմիր Զելենսկին հայտարարել է, որ չի եկել խաղալու։ Նա հավելել է՝ ԱՄՆ-ն իրավունք չունի հրամայել Ուկրաինային՝ ինչ անել։

Թրամփի խոսքով՝ Ուկրաինան «շատ լավ վիճակում չէ», և Կիևը չի կարող Վաշինգտոնին թելադրել՝ ինչպես վերաբերվել ռուս-ուկրաինական հակամարտությանը։ Նա ընդգծել է, որ պատասխանատվություն է զգում ԱՄՆ-ի մասնակցության համար։ ԱՄՆ նախագահը նաև շեշտել է, որ Վաշինգտոնը չի ցանկանում Ուկրաինային շատ զենք ուղարկել, այլ ցանկանում է պատերազմի ավարտ։

Խոսելով ԱՄՆ-Ուկրաինա հազվագյուտ մետաղների համաձայնագրի մասին՝ Թրամփը նշել է, որ այն «շատ արդար է»։  Զելենսկին շնորհակալություն է հայտնել Թրամփին օգտակար հանածոների մասին համաձայնագրի համար, նաև հավելել, որ ցանկանում է քննարկել, թե ԱՄՆ-ն ինչ կարող է անել հակամարտության կարգավորման համար։ Նա հույս է հայտնել, որ «միասին կարող են կանգնեցնել այն» (նկատի ունենալով Պուտինին)։

Զելենսկին ընդգծել է, որ Ուկրաինան կարիք ունի ամերիկյան հակաօդային պաշտպանության համակարգի։ Նա Թրամփին պատերազմի մի քանի լուսանկարներ է ցուցադրել՝ ասելով․ «Նույնիսկ պատերազմում կան կանոններ։ Բայց այս տղաները [Ռուսաստանը] կանոններ չունեն»։

Ուկրաինայի նախագահի խոսքով՝ «միայն հրադադարը» Ռուսաստանին չի կանգնեցնի։ Նա նշել է, որ Կիևը չի համաձայնի մարտական գործողությունների դադարեցմանը՝ առանց երկարատև խաղաղության երաշխիքների։

«ԱՄՆ-ը պետք է երաշխիքներ տա Մեծ Բրիտանիային և Ֆրանսիային, որպեսզի նրանք տեղակայեն խաղաղապահ ուժեր Ուկրաինայում։ Հակառակ դեպքում՝ Լոնդոնն ու Փարիզը դա չեն անի»,- ասել է Զելենսկին։

Լրագրողների հարցին՝ արդյո՞ք ԱՄՆ-ը պատրաստ է Ուկրաինային անվտանգության երաշխիքներ տալ խաղաղության համաձայնագրի շրջանակում, Թրամփը պատասխանել է․ «Ես հիմա անվտանգության մասին մտածել չեմ ուզում, նախ պետք է համաձայնագիր կնքել»։

Էմմա Չոբանյան