30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Բերման է ենթարկվել Ծառուկյանի փեսա, Ուկրաինայում ՀՀ նախկին դեսպան Անդրանիկ Մանուկյանի որդին
Հասարակություն
26.02.2025 | 16:50
Փետրվարի 24-ին մայրաքաղաքում ապօրինի զենք-զինամթերք կրելու և պահելու կասկածանքով ձերբակալվել և քրեական ոստիկանության Երևան քաղաքի վարչություն է տեղափոխվել 7 անձ։ Այս մասին Factor.am-ի հարցմանն ի պատասխան հայտնեց ՆԳՆ խոսնակ Նարեկ Սարգսյանը։
«Հայտնաբերվել է մեկ «ԻԺ» մոդելի ատրճանակ՝ լիցքավորված 8 փամփուշտով, մեկ «Չեզեթ» տեսակի ատրճանակի փամփշտատուփ՝ 9 փամփուշտով և մեկ դանակ»,- ասաց Նարեկ Սարգսյանը։
ՆԳՆ խոսնակի փոխանցմամբ՝ կազմվել են փաստաթղթեր, որոնք փոխանցվել են Քննչական կոմիտե։
Factor.am-ի տեղեկություններով՝ բերման ենթարկված 7 անձանցից մեկը Գագիկ Ծառուկյանի փեսա, Ուկրաինայում ՀՀ նախկին դեսպան Անդրանիկ Մանուկյանի որդի Դավիթ Մանուկյանն է։ Նա եղել է Ազգային ժողովի նախկին պատգամավոր։
Քննչական կոմիտեի մամուլի քարտուղար Կիմա Ավդալյանը Factor.am-ի հարցին ի պատասխան ասաց, որ դեպքի առթիվ նախաձեռնվել է քրեական վարույթ՝ ապօրինի կերպով հրազեն (բացառությամբ քաղաքացիական ողորկափող հրազենի, դրա փամփուշտների կամ դրա բաղկացուցիչ մասերի), դրա հիմնական բաղկացուցիչ մաս, ռազմամթերք, ակոսափող հրազենի փամփուշտ, պայթուցիկ նյութ կամ պայթեցման սարք ձեռք բերելու, իրացնելու, պահելու, փոխադրելու, առաքելու կամ կրելու հատկանիշներով։
Արփի Հակոբյան
