11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Մակրոնը չի կարողացել Թրամփին համոզել Ուկրաինայում ԵՄ զորքերին աջակցելու անհրաժեշտության հարցում․ FT
Քաղաքականություն
26.02.2025 | 11:30
ԱՄՆ նախագահ Դոնալդ Թրամփը Ֆրանսիայի նախագահ Էմանուել Մակրոնի հետ հանդիպմանը կոնկրետ պարտավորություններ չի ստանձնել՝ աջակցելու Ուկրաինայում եվրոպական զորակազմին հրադադարի ռեժիմը վերահսկելու համար։ Այս մասին գրում է Financial Times-ը՝ հղում անելով Ֆրանսիայի կառավարությունում իր աղբյուրին։
Ֆրանսիացի պաշտոնյան, որը ցանկացել է անհայտ մնալ, նշել է, որ Ուկրաինայում արևմտյան զորակազմին ԱՄՆ-ի աջակցության վերաբերյալ վերջնական համաձայնություն դեռևս չկա։ Սակայն Դոնալդ Թրամփը դեմ չի եղել այս զորախմբի համար անվտանգության ամերիկյան երաշխիքներ տրամադրելուն։
FT-ի աղբյուրը նաև ընդգծել է, որ Թրամփի և Ֆրանսիայի նախագահ Էմանուել Մակրոնի քննարկումների մեծ մասը նվիրված է եղել Ռուսաստանի կողմից հրադադարի պահպանման ապահովմանը։ Առանձնահատուկ ուշադրություն է դարձվել հարցին, թե ինչպես խուսափել 2015-2016 թվականների Մինսկի համաձայնագրերի հետ կապված իրավիճակի կրկնությունից։
Ավելի վաղ Ֆրանսիայի և Մեծ Բրիտանիայի իշխանությունները հայտարարել էին, որ պատրաստ են ստանձնել Ուկրաինայի հետպատերազմյան անվտանգության հիմնական մասը, սակայն դա անելու համար նրանց անհրաժեշտ է ԱՄՆ-ի նյութատեխնիկական և հետախուզական աջակցությունը:
Դոնալդ Թրամփի և Էմանուել Մակրոնի հանդիպումը տեղի է ունեցել փետրվարի 24-ին Վաշինգտոնում։ Մեծ Բրիտանիայի վարչապետ Քիր Սթարմերը Վաշինգտոն կժամանի փետրվարի 27-ին։
Թարգմանությունը՝ Տաթև Ֆռանգյանի
