09.10.2026 | 16:19
Սպանության նախապատրաստության գործով 4 անձ է ձերբակալվել․ իրավապահները կանխել են հանցագործությունը
ԵՄ-ն հայտարարել է ՌԴ-ի դեմ պատժամիջոցների 16-րդ փաթեթի սահմանման մասին
Քաղաքականություն
24.02.2025 | 13:15
ԵՄ-ն հայտարարել է Ռուսաստանի դեմ պատժամիջոցների 16-րդ փաթեթի սահմանման մասին, որը համընկնում է Ուկրաինա ռուսական լայնամասշտաբ ներխուժման մեկնարկի երրորդ տարելիցի հետ, գրում է BBC-ի ռուսական ծառայությունը։
Պատժամիջոցներ են կիրառվել 48 ֆիզիկական և 35 իրավաբանական անձանց նկատմամբ, որոնք պատասխանատու են այն գործողությունների համար, որոնք խաթարում կամ սպառնում են Ուկրաինայի տարածքային ամբողջականությանը, ինքնիշխանությանը և անկախությանը։ Սահմանափակումների են ենթարկվել նաև ստվերային ռուսական նավատորմի 74 տանկերներ, որոնք ռուսական նավթը տեղափոխում են՝ շրջանցելով պատժամիջոցները։
«Արդեն երեք տարի է՝ Ռուսաստանն անխնա ռմբակոծում է Ուկրաինան՝ փորձելով գողանալ իրեն չպատկանող հողերը։ Պատժամիջոցների այս նոր փուլն ուղղված է ոչ միայն Ռուսաստանի ստվերային նավատորմի, այլև նրանց դեմ, որոնք աջակցում են ոչ ապահով նավթատարների շահագործմանը, տեսախաղերի կառավարիչներին, որոնք օգտագործվում են անօդաչու թռչող սարքերի համար, բանկերի, որոնք օգտագործվում են մեր պատժամիջոցները շրջանցելու համար, և քարոզչական ալիքների, որոնք օգտագործվում են սուտ տարածելու համար։ Կասկած չկա, թե ով է ագրեսորը, ով պետք է վճարի և պատասխանատվություն կրի այս պատերազմի համար։ Պատժամիջոցների յուրաքանչյուր փաթեթ Կրեմլին զրկում է պատերազմ վարելու միջոցներից։ Ռուսական ագրեսիան դադարեցնելու բանակցությունների պայմաններում մենք պետք է Ուկրաինային դնենք հնարավորինս ամուր դիրքերում։ Պատժամիջոցները լծակներ են ապահովում»,- հայտարարել է ԵՄ դիվանագիտության ղեկավար Կայա Կալլասը։
Նոր պատժամիջոցներով ԵՄ-ն նաև որոշել է ռուսական 13 բանկերի անջատել SWIFT միջազգային բանկային համակարգից։ Բացի այդ, ռուսական ութ լրատվամիջոց կորցնում է Եվրամիությունում հեռարձակման լիցենզիան։ Նրանց թվում են Lenta.ru-ն և «Զվեզդա» հեռուստաալիքը։
Ռուսաստանի դեմ պատժամիջոցների նախորդ՝ 15-րդ փաթեթը Եվրամիությունն ընդունել էր 2024 թվականի դեկտեմբերի 15-ին։ Այն ժամանակ սահմանափակումների էին ենթարկվել 54 ֆիզիկական և 30 իրավաբանական անձինք։
Թարգմանությունը՝ Էմմա Չոբանյանի
