«Ղարաբաղցի՞ ես, թե՞ հայ»․ ՔՊ-ական Էմմա Պալյանի ՔՊ-ական եղբոր հարցադրումը․ պատգամավոր քույրը «վրիպակ» է համարում

«Ղարաբաղցի՞ ես, թե՞ հայ»,-ֆեյսբուքում նման հարցադրում է արել ԱԺ ՔՊ խմբակցության պատգամավոր Էմմա Պալյանի եղբայր, միաժամանակ ԱԺ-ում նրա օգնական Հայկո Պալյանը։ Պատգամավորի ՔՊ-ական եղբայրն այս հարցադրումն արել է ձյան թեմայով մի հումորային գրառման տակ։ Factor.am-ը թեմայի վերաբերյալ մեկնաբանություն խնդրեց Էմմա Պալյանից։ Չնայած, որ մեկնաբանության սքրինշոթը մեծ տարածում է գտել համացանցում, պատգամավորն ասաց, թե տեղյակ չէ՝ ինչի մասին է խոսքը։

«Ես Գյումրու ընտրություններով եմ զբաղված՝ չգիտեմ, թե ինչի մասին է խոսքը»,-ասաց նա, իսկ ճշտող հարցին՝ ընդունելի՞ է եղբոր նման պահվածքը, իշխանական պատգամավորն ասաց․ «Ես իշխող թիմի ներկայացուցիչ եմ և տեսնում եք, թե մենք ոնց ենք վերաբերվում Ղարաբաղից բռնի տեղահանված մեր հայրենակիցներին։ Մտածու՞մ եք, որ ես պետք է ասեմ՝ OK է։ Մեր հայրենակիցներն են, ինչպես կարող է դա նորմալ լինել։ Ես տեղյակ չեմ, թե ինչ դիրքորոշում է հայտնել, բայց, եթե դուք ինձ ուղարկեք այդ սքրինշոթը, եթե նման հրապարակում կա, եթե դա իրականությանը համապատասխանում է, դա դատապարտելի է, հրապարակավ ներողություն հայտնելու քայլ է։ Ինչ-որ վրիպակ է»,-ասաց նա՝ շեշտելով, որ եթե իրական լինի՝ հորդորելու է, որ եղբայրը հնարավորինս շուտ ներողություն խնդրի։

Սքրինշոթի տրամադրումից հետո, սակայն, Էմմա Պալյանը կապ հաստատեց Factor.am-ի հետ ու հետևյալ պարզաբանումը ներկայացրեց․ «Եղբայրս նկատի է ունեցել՝ Հայաստանի՞ց ես, թե՞ Արցախից։ Որևէ տարանջատման միտում չի եղել։ Բոլորն էլ հայ են՝ անկախ ապրելու վայրից»։

Այնուհանդերձ, նշենք, որ ՔՊ-ական Հայկո Պալյանը հարցադրումն այնպես էր արել, որ տպավարություն է ստեղծվում, թե նա Արցախից բռնի տեղահանվածներին հայ չի համարում։ Ուշագրավ է նաև այն, որ քիչ առաջ Հայկո Պալյանը ֆեյսբուքում իր հաշիվն ապաակտիվացրեց։

Նարեկ Կիրակոսյան