09.10.2026 | 13:09
Ադրբեջաներեն երգ՝ Թուրքմենստանից Փաշինյանի հրապարակած տեսանյութում
ԱՄՆ-ը դեմ է հանդես եկել G7-ի կոմյունիկեում ՌԴ-ին «ագրեսոր» որակելուն․ FT
Քաղաքականություն
20.02.2025 | 20:44
ԱՄՆ-ը դեմ է հանդես եկել փետրվարի 24-ին Ուկրաինա Ռուսաստանի ներխուժման տարելիցի կապակցությամբ «Մեծ յոթնյակի» (G7) կոմյունիկեում ՌԴ-ին «ագրեսոր» որակելուն՝ սպառնալով խաթարել Արևմուտքի միասնության ավանդական ցուցադրությունը։ Այս մասին հայտնում է Financial Times-ը։
Ըստ պարբերականի՝ երկուշաբթի կայանալիք G7-ի վիրտուալ գագաթնաժողովին Ուկրաինայի նախագահ Վլադիմիր Զելենսկիի մասնակցությունը նույնպես դեռևս համաձայնեցված չէ։
Տարաձայնությունները սկսվել են այն բանից հետո, երբ ԱՄՆ նախագահ Դոնալդ Թրամփն Ուկրաինային մեղադրել է պատերազմը հրահրելու մեջ և Զելենսկիին անվանել է «առանց ընտրությունների բռնապետ», միաժամանակ, առաջարկելով, որ ՌԴ-ն կրկին հրավիրվի «Մեծ յոթնյակ»։
Պարբերականի աղբյուրների համաձայն՝ ամերիկացի բանագնացներն առարկում են «ռուսական ագրեսիա» արտահայտության և նմանատիպ այլ արտահայտությունների հարցում, որոնք G7-ի առաջնորդներն օգտագործում են 2022 թվականից ի վեր՝ Ուկրաինայի հակամարտությունը բնութագրելու համար։
Աշխարհի առաջատար տնտեսություններն ավանդաբար փետրվարի 24-ին հայտարարություն են տարածում՝ հաջակցություն Ուկրաինա ՌԴ-ի լայնածավալ ներխուժման տարելիցին։
«Մենք պետք է տարբերություն դնենք Ռուսաստանի և Ուկրաինայի միջև։ Նրանք նույնը չեն»,- Financial Times-ին ասել է եվրոպացի պաշտոնյաներից մեկը։
Թարգմանությունը՝ Տաթև Ֆռանգյանի
