27.04.2025 | 12:45
Էլեկտրամատակարարման պլանային անջատումներ՝ Երևանում և մարզերում
ԱՄՆ ՊՆ ղեկավարը հանձնարարել է առաջիկա 5 տարիներին 40 տոկոսով կրճատել Պենտագոնի բյուջեն․ The Washington Post
Քաղաքականություն
20.02.2025 | 17:00
ԱՄՆ պաշտպանության նախարար Փիթ Հեգսեթը Պենտագոնի ղեկավարությանը և երկրի ռազմական հրամանատարությանը հանձնարարել է առաջիկա հինգ տարիների ընթացքում պաշտպանական բյուջեն տարեկան 8%-ով կրճատելու ծրագիր պատրաստել։ Այս մասին հայտնում է The Washington Post-ը՝ վկայակոչելով համապատասխան փաստաթուղթն ու իրավիճակին ծանոթ պաշտոնյաներին, գրում է Current time-ը։
Հեգսեթի հրամանում նշվում է, որ պլանը պետք է պատրաստ լինի մինչև երկուշաբթի՝ փետրվարի 24-ը, և կրճատումները չպետք է ազդեն 17 կատեգորիաների վրա, ներառյալ՝ գործողություններն ԱՄՆ հարավային սահմանին, միջուկային զենքի և հակահրթիռային պաշտպանության արդիականացումը, սուզանավերի և կամիկաձեի անօդաչու թռչող սարքերի գնումները։
Պենտագոնի 2025 թվականի բյուջեն կազմում է շուրջ 850 միլիարդ դոլար։ Եթե Հեգսեթի պահանջները կատարվեն, այն հինգ տարի շարունակ տարեկան կտրվածքով կկրճատի տասնյակ միլիարդավոր դոլարներ և կլինի Պենտագոնի ծախսերի ամենամեծ կրճատումը 2013 թվականից ի վեր: Փաստաթղթում Հեգսեթն ընդգծում է, որ «ռազմական կարիքներին» ուղղված ծրագրերի ֆինանսավորումը պետք է պահպանվի «ցածր ազդեցություն ունեցող հոդվածների» կրճատման հաշվին, ինչպիսիք են բազմազանությունը, հավասարությունը և ներառման (DEI) ծրագրերը, կլիմայի փոփոխության հետազոտությունը:
Առաջնահերթությունների ցանկը ներառում է խաղաղօվկիանոսյան տարածաշրջանում ռազմական օբյեկտների կառուցումը, ինչպես նաև հնդկախաղաղօվկիանոսյան և հյուսիսային հրամանատարության ֆինանսավորումը:
Ըստ WP-ի՝ Հեգսեթի հրամանը «ուշագրավ է այն ամենով, ինչն այնտեղ չկա», մասնավորապես, այն ոլորտների ցանկը, որոնց ֆինանսավորումը պետք է պահպանվի։ Դրանում չի նշվում Եվրոպական հրամանատարությունը, որն առանցքային դեր է խաղում Ուկրաինային Ռուսաստանի հետ պատերազմում աջակցելու գործում, Կենտրոնական հրամանատարությունը, որը վերահսկում է գործողությունները Մերձավոր Արևելքում կամ Աֆրիկայի հրամանատարությունը, որը վերահսկում է մի քանի հազար ամերիկյան զորքերն ամբողջ մայրցամաքում:
Հիշեցնենք, որ պաշտոնը ստանձնելուց հետո իր առաջին եվրոպական այցի ժամանակ Հեգսեթն ասել էր, որ Վաշինգտոնը չի աջակցում Ուկրաինային ՆԱՏՕ-ին անդամությունը՝ որպես խաղաղ կարգավորման մի մաս, և որ Կիևի համար «իրատեսական չէ» վերադառնալ այն սահմաններին, որոնք գոյություն ունեին մինչև 2014 թվականը, երբ Ռուսաստանը ներխուժեց Ղրիմ և Արևելյան Ուկրաինա: Նա նաև ասել էր, որ եվրոպական զորքերը պետք է լինեն հետպատերազմյան Ուկրաինայի անվտանգությունն ապահովող հիմնական ուժը, և որ ամերիկացի զինվորականները դրան չեն մասնակցելու։
Թարգմանությունը՝ Էմմա Չոբանյանի
