26.08.2026 | 23:30
Երևանում ապամոնտաժվել են ևս երկու ապօրինի կառույցներ. քաղաքապետարան
Ավտոբուսի 2 վարորդ այսօր բռնության է ենթարկվել․ Հայկ Կոստանյան
Հասարակություն
14.02.2025 | 11:14
Երևանի քաղաքապետի խոսնակ Հայկ Կոստանյանը գրառմամբ տեղեկացնում է, որ այսօր անընդունելի միջադեպ է տեղի ունեցել։
«97 համարի ավտոբուսի վարորդի կողմից ուղևորներին վճարում կատարելու հորդորից հետո երեք ուղևորի և վարորդի միջև առաջացել է վիճաբանություն, որի ընթացքում վարորդը ենթարկվել է բռնության։ Վիճաբանության ընթացքում բռնության է ենթարկվել նաև «Երևանի ավտոբուս» ՓԲԸ-ի մեկ այլ վարորդ։Հասարակական տրանսպորտի վարորդների և ուղևորների անվտանգությունը մեզ համար առաջնային նշանակություն ունի, և նման դեպքերը չեն կարող հանդուրժվել։ Տվյալ միջադեպի կապակցությամբ ոստիկանություն է ներկայացվել հաղորդում, և ակնկալում ենք, որ մեղավորները կպատժվեն օրենքի ամբողջ խստությամբ։
Կոչ ենք անում քաղաքացիներին պահպանել հասարակական կարգը, հարգել միմյանց իրավունքներն ու հետևել օրենքի պահանջներին։ Հանրային տրանսպորտից օգտվելիս վճարումը պարտադիր է, և յուրաքանչյուրի պարտքն է կատարել սահմանված կանոնները»,- գրել է Կոստանյանը։
Ներքին գործերի նախարարության մամուլի քարտուղար Նարեկ Սարգսյանը Factor.am-ին փոխանցեց, որ համայնքային ոստիկանության Նուբարաշենի բաժնում դեպքի վերաբերյալ ընդունվում է հաղորդում, մանրամասների վերաբերյալ կտրվի լրացուցիչ տեղեկատվություն։
Հավելենք, որ մի քանի օր առաջ էլ համացանցում տեսանյութ էր տարածվել, թե ինչպես է 15 համարի երթուղին սպասարկող ավտոբուսի վարորդը ուղևորին ստիպում, որ ջնջի տեսանյութը, որում ինքը պարծենում է, որ ամեն ինչի իրավունք ունի։
«Էդ նկարո՞ւմ ես, տուր հեռախոսը, վեկալ ջնջի, ջնջի՛ քեզ ասում եմ»,- ուղևորին ասում է վարորդն ու տեսանյութն ընդհատվում է։
«Երևանի ավտոբուս» ՓԲԸ-ից ու Երևանի քաղաքապետարանից միջադեպից երկու օր անց էլ որևէ մեկնաբանություն չեն տվել։
