Արցախի Հանրապետության Պաշտպանության բանակի կողմից հանրապետության տարածքում ուսումնամարզական հավաքների և պարապմունքների անցկացումը ԱՀ ինքնիշխան իրավունքն է և գտնվում է բացառապես Արցախի Զինված ուժերի իրավասության դաշտում: Արցախում ՊԲ ավիացիայի ուսումնամարզական վարժանքներին Ադրբեջանի արձագանքի և հնչեցրած սպառնալիքի մասին Factor.am-ի հարցմանն ի պատասխան՝ տեղեկացրեցին Արցախի ԱԳՆ-ից:
«Առնվազն տարօրինակ է, որ ադրբեջանական կողմը հանդես է գալիս նման հայտարարությամբ։ ԱՀ ՊԲ կողմից հանրապետության տարածքում ուսումնամարզական հավաքների և պարապմունքների անցկացումը Արցախի Հանրապետության ինքնիշխան իրավունքն է և գտնվում է բացառապես Արցախի Զինված ուժերի իրավասության դաշտում։ Իրականացվող ուսումնամարզական շրջաթռիչքներն անց են կացվում ՊԲ մարտական պատրաստության 2018թ. պլանի համաձայն, որի նպատակն է վարժանքներում ներգրավված անձնակազմի հմտությունների կատարելագործումն ու նրանց մարտական պատրաստվածության աստիճանի բարձրացումը»,- Ստեփանակերտի դիրքորոշումը փոխանցեց ԱՀ ԱԳՆ տեղեկատվության և հասարակայնության հետ կապերի վարչությունը:
Հիշեցնենք, որ սեպտեմբերի 25-28-ը ՊԲ ավիացիան ուսումնամարզական շրջաթռիչքներ է իրականացնում՝ մարտական ինքնաթիռների և ուղղաթիռների ներգրավմամբ: Անդրադառնալով այս վարժանքներին՝ Ադրբեջանի ՊՆ-ն հայկական կողմին մեղադրել էր առաջնագծում իրավիճակը սրելու մեջ և սպառնացել համարժեք պատասխան տալ՝ հայտարարելով, որ ցանկացած օդային միջոց, որը կփորձի մոտենալ Ադրբեջանի զինված ստորաբաժանումների առաջնային դիրքերին, անմիջապես կչեզոքացվի:
