Պետդումայի պատգամավորն արձագանքել է Ադրբեջան իր մուտքի արգելքի՝ Բաքվի որոշմանը

ՌԴ Պետդումայի պատգամավոր Նիկոլայ Վալուևը ՌԻԱ Նովոստիին ասել է, որ սադրանք չի համարում Ադրբեջանի իշխանությունների՝ երկիր իր մուտքն արգելելու որոշումը։ Նշենք, որ Վալուևը իշխող «Եդինայա Ռոսիա»կուսակցության անդամ է։

«Ես դա չեմ դիտարկի որպես ինչ-որ սադրանք։ Արևելքը նուրբ հարց է: Ցանկացած արևելյան առաջնորդ, արևելյան, Ադրբեջանը մենք դեռ համարում ենք արևելյան հանրապետություն, պետք է համապատասխանի իր հաստատված պատմական ավանդույթներին։ Առաջին հերթին նա (Ադրբեջանի ղեկավարը) ներկայացնում և պաշտպանում է իր ժողովրդին, նրանք ունեն իրենց կանոնները և իրենց կանոնադրությունը»,- ասել է Վալուևը։

Նա նշել է, որ այս պահին դժվար է մեկնաբանել իրավիճակը, քանի որ պաշտոնական փաստաթղթեր չկան։ Վալուևը հավելել է, որ ինքը միշտ պաշտպանել և շարունակելու է պաշտպանել ոչ միայն ձայնի, այլև մշակույթի ռուսական իրավունքը։

«Ռուսական տունը, ինձ թվում է, ռուսական մշակույթի, բարիդրացիական հարաբերությունների և այլ առաջադրանքների նախագիծ է, որը գտնվում է ժողովրդական դիվանագիտության հարթության մեջ, որը գոյություն ունի մեր նախկին մեծ պետության բոլոր հանրապետություններում, մեր ընդհանուր տանը՝ Խորհրդային Միությունում: Ռուսական տունը գոյություն ունի ժողովուրդների միջև բացառիկ բարձր մշակութային փոխանակման համար»,- ասել է պատգամավորը։

Վալուևը նաև հույս է հայտնել, որ Բաքվում «Ռուսական տան» փակման հետ կապված թյուրիմացությունը կշտկվի։ Նրա խոսքով՝ դա կարող է իրականացվել երկու երկրների՝ Ռուսաստանի եւ Ադրբեջանի ղեկավարների մակարդակով։

Հիշեցնենք, որ Ադրբեջանի ԱԳՆ-ն Պետդումայի պատգամավոր Նիկոլայ Վալուևին «անցանկալի անձ» է հայտարարել և արգելել նրա մուտքը երկիր։

Թարգմանությունը՝ Էմմա Չոբանյանի