06.10.2026 | 18:30
Ալեն Սիմոնյանն ընդունել է Հայաստանում դիվանագիտական առաքելությունն ավարտող Լյուքսեմբուրգի դեսպանին
Երևանի փոխքաղաքապետը կհանդիպի «Հաղթանակ» թաղամասի բողոքող բնակիչների հետ
Հասարակություն
10.02.2025 | 17:10
Երևանի քաղաքապետի առաջին տեղակալ Արմեն Փամբուխչյանը փետրվարի 12–ին կընդունի «Հաղթանակ» թաղամասի բողոքող բնակիչներին։ Այս մասին հայտնում է Երևանի քաղաքապետի խոսնակ Հայկ Կոստանյանը` անդրադառնալով այսօրվա ակցիային։
Թաղամասի բնակիչները փակել էին Հյուսիս-հարավ ճանապարհը և դժգոհում, որ տևական ժամանակ է՝ չեն կարողանում իրենց սեփական հողերի հետ կապված գործարքներ անել, գյուղատնտեսական նշանակության հողերի կարգավիճակը փոխել և այլն: Նրանք նաև հանդիպում էին պահանջում ինչպես քաղաքապետ Տիգրան Ավինյանի, այնպես էլ ԱԺ պատգամավորների հետ, որոնց հետ հարցի վերաբերյալ քննարկումներ են ունեցել։
«Մալաթիա-Սեբաստիայի «Հաղթանակ» թաղամասի բնակիչները տասնամյակներ շարունակ սպասել են իրենց հողերի սեփականության իրավունքի հարցի լուծմանը։ Երևանի քաղաքապետարանը գործընթացը գործնական փուլ է տեղափոխել, և 2022 թվականից սկսած՝ հողի սեփականության ակտերի հիման վրա արդեն 96 որոշում է կայացվել»,– ֆեյսբուքյան էջում գրել է Կոստանյանը։
Նրա խոսքով` խնդիրը քննարկելու նպատակով դեռևս հունվարին Երևանի քաղաքապետ Տիգրան Ավինյանը հանդիպել է բնակիչների հետ, նախորդ շաբաթ նրանց ընդունել է քաղաքապետի առաջին տեղակալ Արմեն Փամբուխչյանը։
Կոստանյանը նշել է, որ քաղաքային իշխանությունները պատրաստ են իրենց լիազորությունների շրջանակում շարունակել աշխատանքները՝ հարցի հնարավոր լավագույն լուծումը գտնելու համար։
