Թրամփը հայտարարել է պողպատի և ալյումինի ներմուծման մաքսատուրքեր սահմանելու մասին

ԱՄՆ նախագահ Դոնալդ Թրամփը հայտարարել է պողպատի և ալյումինի ներմուծման համար 25 տոկոս մաքսատուրքեր սահմանելու մասին, հաղորդում է DW-ի ռուսական ծառայությունը։

Ըստ նրա՝ նոր մաքսատուրքերը կվերաբերեն բոլոր երկրներին և պաշտոնապես ուժի մեջ կմտնեն այս շաբաթ։ Բացի այդ, Թրամփը հայտարարել է ամերիկյան ապրանքների համար մաքսատուրքեր սահմանող երկրների համար «փոխադարձ մաքսատուրքեր» ներդնելու մտադրության մասին։

«25 տոկոս մաքսատուրք կլինի պողպատի համար։ Ալյումինի համար՝ նույնպես»,- ասել է նա։

Սպիտակ տուն վերադառնալուց հետո Թրամփը սկսել է կոշտ սակագնային քաղաքականություն իրականացնել։ Նա մաքսատուրքերով է սպառնացել Եվրամիությանը՝ վկայակոչելով Եվրոպայի հետ առևտրային դեֆիցիտի կրճատման անհրաժեշտությունը, և հրահանգել 10 տոկոս մաքսատուրք սահմանել Չինաստանից ու 25 տոկոս մաքսատուրք՝ հարևան Մեքսիկայից և Կանադայից ապրանքների ներմուծման համար՝ «անօրինական միգրանտների և թմրանյութերի սպառնալիքի պատճառով»: Այս մաքսատուրքերը 30 օրով սառեցվել են այն բանից հետո, երբ Օտտավան և Մեխիկոն խոստացել են ուժեղացնել անվտանգությունը Միացյալ Նահանգների հետ իրենց սահմաններին։

Բրյուսելում կայացած վերջին գագաթնաժողովում Եվրամիությունը Դոնալդ Թրամփի մաքսային քաղաքականությանը դիմակայելու վճռականություն է ցուցադրել։ Գերմանիայի կանցլեր Օլաֆ Շոլցը և Ֆրանսիայի նախագահ Էմանուել Մակրոնը հայտարարել են, որ ԵՄ-ն կպատասխանի, եթե ԱՄՆ-ը մաքսատուրքեր սահմանի եվրոպական ապրանքների համար:

Թարգմանությունը՝ Տաթև Ֆռանգյանի