Բարձր աճ ունենք․ Գևորգ Պապոյանը ներկայացրեց ՀՀ-ից պտուղ- բանջարեղենի և ծաղկի արտահանման ծավալները․ ՏԵՍԱՆՅՈՒԹ

Ժամանակակից տեխնոլոգիաներով խոշոր ջերմատներ հիմնելու համար կտրվի մինչև 15 մլրդ դրամի սուբսիդավորվող վարկ, այս մասին Կառավարության նիստի ժամանակ տեղեկացրեց ՀՀ էկոնոմիկայի նախարար Գևորգ Պապոյանը։ Նախարարի խոսքով՝ տրամադրվող աջակցությունը կնպաստի շուրջ 4-5 հեկտար տարածքով ջերմատների հիմնմանը, քանի որ տրամադրվում է առավելագույնը 3 մլրդ դրամի վարկ: Ըստ Պապոյանի՝ ավելի խոշոր ներդրումային ծրագրեր իրականացնող շահառուների համար գործող աջակցության գործիքը հնարավորություններ չի ընձեռում:

«Նախագծով հնարավորություն է ստեղծվում խոշոր ջերմատնային տնտեսություններ հիմնել, դրա համար տրամադրել շահառուներին մինչև 15 մլրդ դրամ սուբսիդավորվող վարկ, որը հնարավորություն է տալու 1 շահառուի համար հիմնելու մինչև 20 հեկտար տարածքով ջեմատուն: Նախարարությունն այս պահին նման հայտեր ունի: Ընդ որում՝ տրամադրված վարկի մինչև 3 մլրդ ՀՀ դրամ մասնաբաժինը կսուբսիդավորվի գործող 10 տոկոսային կետով, 3-9 մլրդ դրամի մասնաբաժինը՝ 9 տոկոսային կետով, 9-15 մլրդ դրամի մասնաբաժինը՝ 8 տոկոսային կետով»,- ասաց Էկոնոմիկայի նախարարը՝ ընդգծելով, , որ նախագծի ընդունումը կխթանի խոշոր ջերմատնային տնտեսությունների կառուցումը:

Նախագծից բացի Գևորգ Պապոյանը ներկայացրեց նաև ջերմոցային տնտեսություններում աճեցվող պտուղ- բանջարեղենի և ծաղկի արտահանման ծավալները՝ միաժամանակ հայտնելով, որ բարձր աճ ունենք։

Նախարարը տեղեկացմամբ՝ մեր երկրից 2023-ին արտահանվել է 40 մլն հատ ծաղիկ, 2024-ին՝ 55 մլն հատ։

Մանրամասները՝ տեսանյութում։