30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
«Էդ անձի էությունը որ նայում եմ, ուզում եմ դատեմ»․ ով է Ոստիկանությունում պաշտոն ստացած Հայկ Հարությունյանը
Հասարակություն
04.02.2025 | 17:24
Օրերս Դատախազությունում պաշտոնից ազատված դատախազ Հայկ Հարությունյանն այսօր նշանակվել է ՀՀ ներքին գործերի նախարարության Քրեական ոստիկանության Երևան քաղաքի վարչության պետ։ Տեղեկությունը Factor TV-ի հետ զրույցում հաստատեցին ՆԳՆ ոստիկանությունից։ Հարությունյանը քաղաքական հնչերանգ ունեցող մի շարք աղմկահարուց գործերով դատախազ է եղել։
Դրանցից մեկը ՀՀ երկրորդ նախագահ Ռոբերտ Քոչարյանի որդու՝ Ազգային ժողովի «Հայաստան» խմբակցության պատգամավոր Լևոն Քոչարյանի գործն է։ Ըստ այս գործի նյութերի՝ Լևոն Քոչարյանն ու ընկերը՝ Սերգեյ Ասատուրովը, 2023 թվականին Արցախի հայ բնակչության բռնի տեղահանման օրերին Երևանում սկսված բողոքի ակցիաների ժամանակ բռնություն են գործադրել Ոստիկանության աշխատակիցների նկատմամբ, մինչդեռ Քոչարյանը պնդում է, որ ոստիկաններն են իր նկատմամբ բռնություն գործադրել։
Հայկ Հարությունյանը նաև հանրային մեղադրող է «Իմնեմնիմի» հաղորդաշարի գործով անցնող Վազգեն Սաղաթելյանի և Նարեկ Սամսոնյանի գործով։ Օրերս մամուլում հայտնվել է ձայնագրություն, որի բովանդակությունը կասկածի տակ է դնում Հայկ Հարությունյանը անաչառությունը՝ որպես մեղադրող։ Հարությունյանը դասախոսում է Ֆրանսիական համալսարանում։ Ինչպես պարզ է դառնում ձայնագրությունից, ուսանողները դասախոսությամբ հանդես եկող Հարությունյանին հարց են տվել «Իմնեմնիմիի» գործի մասին, նրան ձայնագրել և հրապարակել ձայնագրությունը։ Դրանում, խոսելով մեղադրյալ Նարեկ Սամսոնյանի մասին՝ Հարությունյանը նշում է․
«Ուղղակի ես, անկեղծ ասած, ես էդ անձի հետ կապված, էլ չեմ թաքցնի, հակակրանք ունեմ էլի, էդ անձի էությունը որ նայում եմ, ուզում եմ դատեմ։ Իհարկե, չեթաք, ասեք, շահագրգռվածության, անաչառության, բացարկի հարց լինի։ Իրականում էդ անձը, վոոփշըմ, իմ վրա վատ ազդեցություն ունի»։
Այսինքն՝ կարելի է եզրակացնել, որ ինքը՝ Հարությունյանը ուսանողների հետ զրույցում զգուշացնում է, որ եթե պարզ դառնա իր անձնական հակակրանքը Նարեկ Սամսոնյանի նկատմամբ, ապա դա կարող է դառնալ իրեն բացարկի հիմք։
Ձայնագրությունը Դատախազությունում ուսումնասիրության առարկա դարձել է, թե ոչ, այս պահին մեզ հայտնի չէ, սակայն փաստ է, որ այս ձայնագրությունը խոչընդոտ չի հանդիսացել Հարությունյանին ՆԳՆ-ում բարձր պաշտոնի նշանակելու համար։
Արաքս Մամուլյան
