Փաշինյանն ինքն է ասել` դավաճան որակումը սովորական են ընդունում, այս պրոցեսը դուրս է որեւէ տրամաբանությունից. Տիգրան Աբրահամյանը՝ Ղարիբ Բաբայանին կալանավորելու մասին. ՏԵՍԱՆՅՈՒԹ

Այս գործընթացը դուրս է որեւէ տրրամաբանությունից, նախկինում եղել են շատ ավելի կոպիտ  որակումներ, բայց այսպիսի արձագանք չի եղել։ Փաշինյանն ինքն է ասել` դավաճան որակումը սովորական են ընդունում, եւ այս առումով էլ այստեղ հակասում են իրենք։ Անդրադառնալով Ացախցի Ղարիբ Բաբայանին ֆեյսբուքյան գրառման եւ Հանրապետության հրապարակում ադրբեջաներենով   երգող քաղաքացիների տեսանյութի հրապրակման համար  ձերբակալելուն եւ ներկայումս նրա կալանքի հարցով դատավարությանը՝ ասել է ԱԺ  պատգամավոր Տիգրան Աբրահամյանը։

Ավելի վաղ տեղեկացրել էինք, որ Աջափնյակի դատարանի դիմաց քաղաքացիների հոսքը չի դադարում: Այստեղ հավաքված անձինք պահանջում են ազատ արձակել արցախցի 70-ամյա գիտնական Ղարիբ Բաբայանին, որին այսօր ձերբակալել է Քննչական կոմիտեն:

Հիշեցնենք, որ քննչական կոմիտեն այսօր հայտարարություն է տարածել՝ հայտնելով, որ Հանրապետության հրապարակում մի խումբ օտարերկրացիների մասնակցությամբ տեսանյութ տարածող անձը ձերբակալվել է. «Ատելություն, խտրականություն, անհանդուրժողականություն և թշնամանք հրահրելուն և քարոզելուն ուղղված հրապարակային խոսքի, ինչպես նաև այդ նպատակով նյութեր տարածելու դեպքի առթիվ ՀՀ ազգային անվտանգության ծառայության կողմից ներկայացված հանցագործության մասին պատշաճ հաղորդման հիման վրա 2025 թվականի հունվարի 31-ին ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում նախաձեռնվել է քրեական վարույթ։

Քրեական վարույթով կատարված քննչական գործողությունների և ձեռնարկված օպերատիվ հետախուզական միջոցառումների արդյունքում պարզվել է, որ Ղ.Բ.-ն 2025 թվականի հունվարի 30-ին իր կողմից օգտագործվող «Ռազմավարական հետազոտությունների անկախ կենտրոն» անվամբ բաց հասանելիություն ունեցող ֆեյսբուքյան էջում հրապարակել է Հանրապետության հրապարակում օտարերկրյա մի խումբ քաղաքացիների մասնակցությամբ կատարված տեսագրություն և դրա էությունը խեղաթյուրող մեկնաբանություններ՝ այդ կերպ տարածելով քաղաքական և այլ հայացքներով, անձնական և սոցիալական բնույթի այլ հանգամանքներով պայմանավորված՝ ՀՀ իշխանությունների և ՀՀ ոստիկանության ծառայողների նկատմամբ ատելություն, անհանդուրժողականություն և թշնամանք հրահրելուն ու քարոզելուն ուղղված նյութ և հրապարակային խոսք։ Նշված արարքը կատարելու համար Ղ․Բ.-ի նկատմամբ հարուցվել է հանրային քրեական հետապնդում՝ Քրեական օրենսգրքի 329-րդ հոդվածի 2-րդ մասի 3-րդ կետով (ատելություն, խտրականություն, անհանդուրժողականություն կամ թշնամանք հրահրելուն կամ քարոզելուն ուղղված հրապարակային խոսքը, ինչպես նաև այդ նպատակով նյութեր կամ առարկաներ տարածելը)։ Վերջինս ձերբակալվել է և նրա նկատմամբ կալանքը որպես խափանման միջոց ընտրելու միջնորդություն է ներկայացվել դատարան»,- հայտնել է Քննչական կոմիտեն:

Նշենք, որ հունվարի 30-ին հրապարակվել է տեսանյութ, որում Հանրապետության հրապարակում մի խումբ քաղաքացիներ ադրբեջաներենով երգում են «Իմ Ղարաբաղ» երգը: Ի սկզբանե նշվում էր, որ երգող անձինք ադրբեջանցիներ են, սակայն հետագայում ԱԱԾ-ն հայտարարություն տարածեց այն մասին, որ նրանք Իրանի Իսլամական Հանրապետության քաղաքացիներ են։

Մանրամասները՝ տեսանյութում։