02.04.2025 | 23:22
Երևանում և 9 մարզում էլեկտրաէներգիայի անջատումներ կլինեն
«Աշխատավարձը պետք է մեզ հերիքի, նորմալ ապրենք». ԶՊՄԿ աշխատակիցները աշխատավարձերի բարձրացում են պահանջում․ ԼՈՒՍԱՆԿԱՐՆԵՐ
Հասարակություն
01.02.2025 | 12:31
Զանգեզուրի պղնձամոլիբդենային կոմբինատի աշխատակիցները գործադուլ են ասում: Նրանք պահանջում են աշխատավարձերի բարձրացում: «Բոլորի խնդիրն էլ նույնն է, 99 տոկոսը վարկեր ունի: Մեր աշխատավարձը պետք է մեզ հերիքի, նորմալ ապրենք»,- նշում է աշխատակիցներից մեկը:
Մեկ այլ աշխատակցի խոսքով` աշխատավարձերի բարձրացում եղել է, բայց դա նրանց չի բավարարում: Բացի այդ` տարբեր չափերով են բարձրացրել աշխատավարձը, ինչը աշխատողների շրջանում ներքին խնդիրներ է առաջացրել:
«Աշխատավարձը բարձրացրել են ըստ տոկոսադրույքի, բանվորներին լարում են իրար դեմ: Հիմա մեկինը բարձրացել է 16 տոկոսով, մյուսինը` 25 տոկոսով: Բանվորին ասում են` գնա էս գործն արա, ասում ա` ես չեմ կարա էդ գործն անեմ, պիտի ինքն անի: Էդպես չենք ուզում, ուզում ենք բոլորին մի թվով բարձրացնեն»,- նշում է նա:
Աշխատակիցներից մեկն էլ հավելում է. աշխատանքն այնքան է կանգնելու, որ համաձայնեն: «Հիմա ասել են` ում աշխատավարձը ցածր է 300 հազարից, նրանը բարձրանա 40 տոկոսով, ումը մինչև 500 է՝ 30 տոկոսով, ումը 500 հազարից ավելի է` 20 տոկոսով: Ասել են, էդ էլ չեն համաձայնվել, դե չեն համաձայնվել, թող էնքան կանգնի, մինչև համաձայնվեն»,- նշում է նա:
Նշենք, որ ԶՊՄԿ-ն հաղորդագրություն է տարածել` տեղի ունեցողը որակելով անօրինական: Նշվում է, որ «եթե վերոնշյալ անօրինական գործողությունները շարունակվեն, ընկերությունը ստիպված կլինի իր աշխատակիցների զգալի թվին ուղարկել հարկադիր պարապուրդի»:
«Հաշվի առնելով վերը նշվածը, ելնելով «ԶՊՄԿ» ՓԲԸ և Ընկերության աշխատակիցների ճնշող մեծամասնության շահերից, Ընկերությունը կիրացնի աշխատանքային պարտավորությունները խախտողներին կարգապահական պատասխանատվության ենթարկելու իր իրավունքները՝ համաձայն ՀՀ աշխատանքային օրենսգրքի 21-րդ գլխի»,- ասված է հայտարարության մեջ:
Նկատենք, որ երեկ ՀՀ վարչապետ Նիկոլի Փաշինյանը ասուլիսին անդրադառնալով ԶՄՊԿ-ի գործունեությանը, նշեց, որ առաջին անգամ ՀՀ պետական բյուջեն Զանգեզուրի պղնձամոլիբդենային կոմբինատից 33 մլրդ դրամի շահաբաժին է ստացել։
«Մենք 2021 թվականին և այս պահի դրությամբ՝ ՀՀ Կառավարությունը, այսինքն` ժողովուրդը, Զանգեզուրի պղնձամոլիբդենային կոմբինատի սեփականատերն է, այդ բաժնեմասը արժի մի քանի տասնյակ միլիարդ դրամ, սա փաստ է:
Ես 2023 թվականին մի վիճակագրություն ներկայացրի, ասացի, որ 2022 թվականին Զանգեզուրի պղնձամոլիբդենային կոմբինատը ավելի շատ հարկ է վճարել, քան 2012, 2013, 2014, 2015, 2016, 2017 թվականներին իրար հետ վերցրած. դրանից 7 մլրդ-ից ավելի հարկ է վճարել: Խոսքը 124 մլրդ դրամի մասին է։
Այս տարի ԶՊՄԿ-ն ոչ միայն ՀՀ ամենամեծ հարկատուն է՝ 94 մլրդ հարկի ձևով, այլև առաջին անգամ ՀՀ պետական բյուջեն շահաբաժին է ստացել որպես սեփականատեր 33 մլրդ դրամի»,- ասաց Նիկոլ Փաշինյանը:
