16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Ֆրանսիայի ռազմածովային ուժերը 3 մլրդ դոլարի 9 տոննա թմրանյութ են առգրավել թուրքական նավից
Քաղաքականություն
28.01.2025 | 20:44
Ֆրանսիայի ռազմածովային ուժերը գործողություն են իրականացրել Մարտինիկի ափերի մոտ՝ թիրախավորելով Ստամբուլից մեկնած Haliç-Equality նավը։ Այս մասին հայտնում է թուրքական Deck TV-ն։
Գործողության արդյունքում առգրավվել է ավելի քան 9 տոննա թմրանյութ, որի շուկայական արժեքը գերազանցում է 3 միլիարդ դոլարը։ Թուրք նավատիրոջ պատկանող նավը Ստամբուլից մեկնել է 2024 թվականի նոյեմբերի 12-ին։
Անվտանգության աղբյուրների համաձայն՝ նավը 2024 թվականի դեկտեմբերի 10-ին նավահանգիստ է մտել Գվինեա-Բիսաուում և նավարկել դեկտեմբերի 13-ին՝ շարժվելով դեպի Կարիբյան ավազանի Մարտինիկ։ Կոլումբիայի և Վենեսուելայի մոտակայքում գտնվող Մարտինիկը ֆրանսիական վերահսկողության տակ է և համարվում է թմրամիջոցների առևտրի ռազմավարական կետ՝ թմրանյութերի արտադրության կենտրոններին մոտ լինելու պատճառով:
Դեկտեմբերի 28-ին նավն անջատել է իր ռադարային ազդանշանը՝ կասկածներ հարուցելով։ Ֆրանսիական ուժերը կալանել են նավը 2025 թվականի հունվարի 10-ին՝ հայտնաբերելով 250 փաթեթ։ Փորձարկումները հաստատել են կոկաինի առկայությունը, թմրանյութի արժեքը սև շուկայում գերազանցում է 3 միլիարդ դոլարը:
Լրատվամիջոցը նշում է, որ սա վերջին երեք տարվա ընթացքում հինգերորդ միջադեպն է, որում ներգրավված են մեծ քանակությամբ թմրանյութեր տեղափոխող թուրքական նավեր։ Այս գործողություններում, ընդհանուր առմամբ, առգրավվել է ավելի քան 25 տոննա թմրանյութ՝ շուրջ 10 միլիարդ դոլար արժողությամբ:
Թարգմանությունը՝ Էմմա Չոբանյանի
