Ադրբեջանի իշխանությունները պատրաստվում են հանրաքվեի և նոր՝ «հաղթանակի» Սահմանադրության ընդունման

Ադրբեջանի իշխանություններն ազդարարել են երկրում հանրաքվեի անցկացման և նոր Սահմանադրության ընդունման մասին։ Միլլի Մեջլիսի Մարդու իրավունքների հարցերի խորհրդարանական հանձնաժողովի ղեկավար, Մարդասիրական հետազոտությունների կենտրոնի ղեկավար Զահիդ Օրուջը նշել է, որ «Սահմանադրության և ինքնիշխանության տարվա» շրջանակում առջևում բազմաթիվ մարտահրավերներ կան։

«Այդ մարտահրավերների թվում է նոր հանրաքվեի անցկացումը։ Սահմանադրությունը պետականաշինության գլխավոր ծրագիրն է, այս առումով հնարավոր է նաև «Հաղթանակի Սահմանադրության» ընդունում։ Սահմանադրական նոր կառույցների հարցը քննարկվում և հաճախակի բարձրացվում է խորհրդարանում»,- ասել է Օրուջը։

Հավելենք, որ Ադրբեջանում նոր Սահմանադրության ընդունման մասին խոսակցությունները հատկապես ակտիվացել են 2020 թվականի Արցախյան 44-օրյա պատերազմից հետո։

ԽՍՀՄ-ից անկախանալուց հետո Ադրբեջանի առաջին Սահմանադրությունն ընդունվել է 1995 թվականի նոյեմբերի 12-ին։ Այն երեք անգամ փոփոխվել և լրացվել է՝ 2002 թվականի օգոստոսի 24-ին, 2009 թվականի մարտի 18-ին և 2016 թվականի սեպտեմբերի 26-ին, հանրաքվեների միջոցով։

2009 թվականին վերացվել է մեկ անձի՝ երկու անգամ նախագահ ընտրվելու սահմանափակումը, իսկ 2016 թվականի հանրաքվեով նախագահի պաշտոնավարման ժամկետը 5-ից դարձել է 7 տարի։ Բացի այդ, երկրում հաստատվել է փոխնախագահի պաշտոն։ 2003 թվականից երկիրը ղեկավարող Իլհամ Ալիևը 2017 թվականին առաջին փոխնախագահ է նշանակել իր կնոջը՝ Մեհրիբան Ալիևային։

Թարգմանությունը՝ Էմմա Չոբանյանի