Թրամփը ներում է շնորհել Կապիտոլիումի վրա գրոհողներին, ստորագրել ԱՀԿ-ից ԱՄՆ-ի դուրս գալու հրամանը

Դոնալդ Թրամփը երկուշաբթի երեկոյան որպես Միացյալ Նահանգների 47-րդ նախագահ առաջին անգամ Սպիտակ տուն ժամանելուց հետո անմիջապես գնացել է Օվալաձև աշխատասենյակ, որտեղ ստորագրել է մի շարք փաստաթղթեր։

Առաջիններից մեկը եղել է 2021 թվականի հունվարի 6-ին Կապիտոլիումի գրոհի հարյուրավոր մասնակիցներին ներում շնորհելու հրամանը․ այդ օրը Թրամփի կողմնակիցները փորձել էին կանխել Ջո Բայդենի՝ նախագահի պաշտոնում հաստատումը և անկարգություններ հրահրել Վաշինգտոնում, գրում է BBC-ի ռուսական ծառայությունը։

«Հուսով եմ՝ այսօր ազատ կարձակվեն, սպասում են։ Մոտ 1500 մարդ»,- ասել է Թրամփը։

Ավելի ուշ ամերիկյան լրատվամիջոցները պարզաբանել են, որ Թրամփը սխալվել է թվի հարցում, իրականում ներում է շնորհվել մոտ 1600 մարդու։

Թրամփը նաև մեղմացրել է ծայրահեղ աջ «Oath Keepers and Proud Boys» խմբերի 14 անդամների պատիժը, որոնք դատապարտվել են ապստամբություն հրահրելու և հարձակումը պլանավորելու համար:

Հրամանագիրը նաև պահանջում է, որ ԱՄՆ գլխավոր դատախազը մերժի մոտ 300 գործ, որոնք դեռևս գտնվում են դատարանում:

Թրամփը նաև հրամաններ է ստորագրել Առողջապահության համաշխարհային կազմակերպությունից Միացյալ Նահանգների դուրսբերման գործընթաց սկսելու, մինչ ԱՄՆ-ում արգելելը TikTok-ին 75-օրյա արտոնյալ ժամկետ տրամադրելու, հարավային սահմանին արտակարգ դրություն հայտարարելու և Կանադայի և Մեքսիկայի նկատմամբ մաքսատուրքեր հայտարարելու մասին։

Սպիտակ տուն ժամանելուց առաջ Թրամփը կրկին դիմել է աջակիցներին Capital One Arena-ում, որտեղ նա նաև ցուցադրաբար ստորագրել է մոտ 10 գործադիր հրամաններ, այդ թվում՝ Փարիզի կլիմայի համաձայնագրից ԱՄՆ-ի դուրս գալը և չեղարկել է իր նախորդի՝ Ջո Բայդենի 78 գործադիր հրամանները:

Թարգմանությունը՝ Տաթև Ֆռանգյանի