30.04.2026 | 18:30
Հնդկաստանն ու Հայաստանը ռազմական տեխնիկայի համատեղ մշակում են սկսել. The Indian Express
Թուրքիան արգելափակել է կառավարությանը քննադատող 7 լրատվական կայքերի մուտքը
Քաղաքականություն
10.01.2025 | 23:00
Թուրքիայի իշխանություններն արգելափակել են յոթ լրատվական կայքերի հասանելիությունը, որոնք քննադատում են երկրի իշխող «Արդարություն և զարգացում» կուսակցությանը (ԱԶԿ): Այս մասին հայտնել է քրդամետ Mezopotamya լրատվական գործակալությունը, որին վկայակոչում է Turkish Minute-ը։
Անկարայի 10-րդ քրեական դատարանն արգելափակել է Gazete Patika, ETHA, Mücadele Birliği, Kızıl Bayrak, Özgür Gelecek, Umut Gazetesi և Yeni Demokrasi Gazetesi լրատվական կայքերը՝ «ազգային անվտանգությունն ու հասարակական կարգը պաշտպանելու համար»։
Թուրքիայի նախագահ Ռեջեփ Թայիփ Էրդողանի կառավարությունը պարբերաբար մեղադրվում է խոսքի ազատությունը խլացնելու և սոցիալական ցանցերում իր կառավարության հասցեին քննադատություն արտահայտող մարդկանց նկատմամբ ճնշում գործադրելու մեջ։ Թուրքիայում հազարավոր մարդիկ հետաքննվում, հետապնդվում և բանտարկվում են սոցիալական ցանցերում կառավարությանը ոչ հաճո տեսակետներ հայտնելու համար:
Իրավապաշտպան կազմակերպությունները պարբերաբար մեղադրում են Թուրքիայի կառավարությանը մամուլը վերահսկելու փորձի մեջ՝ լրագրողներին բանտարկելով, փակելով լրատվամիջոցները, վերահսկելով կառավարամետ կոնգլոմերատների կողմից մեդիաների գնումը և կարգավորող մարմիններին ֆինանսական ճնշում գործադրելու համար, հատկապես, 2016 թվականի հուլիսի հեղաշրջման փորձից հետո։
Ըստ «Լրագրողներ առանց սահմանների» (RSF) կազմակերպության՝ Թուրքիայի ազգային լրատվամիջոցների 90 տոկոսը, որը 180 երկրների մեջ 158-րդն է 2024 թվականի մամուլի ազատության համաշխարհային ինդեքսում, պատկանում է իշխանամետ գործարարներին, որոնք հետևում են պաշտոնական գծին։
Թուրքիայում ինտերնետի ազատության վատթարացումը փաստագրվել է նաև ԱՄՆ-ում գործող Freedom House-ի՝ հոկտեմբերին հրապարակած զեկույցում, որը ցույց է տալիս, որ վերջին տասնամյակում Թուրքիայում ինտերնետի ազատությունը կայուն կերպով նվազել է, և երկիրը կրկին դասվել է «ոչ ազատների» շարքին։
Թարգմանությունը՝ Էմմա Չոբանյանի
