Հաղորդաշարեր
04.05.2025 | 21:00Factor TV-ի A-politic հաղորդաշարի հյուրն է Հայաստանի ազգային ֆիլհարմոնիկ նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը: Նվագախմբի 100-ամյակի հետ կապված նա նշում է, որ դա Հայաստանում այն հազվագյուտ կառույցներից է, որը մշտապես առաջ է գնացել, և ամեն մի հաջորդ դարաշրջան ստեղծագործական առումով ավելի արգասաբեր էր: Այդ առումով հաղորդման հյուրը կարևորում է նվագախմբի բոլոր դիրիժորների անուրանալի վաստակը:
Հայաստանի ֆիլհարմոնիկ նվագախմբի բյուջեն չի կազմում աշխարհի առաջատար նվագախմբերի անգամ 5 տոկոսը: Մարդիկ խոսքով բարձր են գնահատում նվագախմբի արժանիքներն ու նշանակությունը, բայց, ըստ դիրիժորի, հաճախ խոսքերից այն կողմ գործն առաջ չի գնում: Երբեմն ասվում է՝ համերգի տոմսեր վաճառեք և դրանով պահե՛ք նվագախումբը: Բայց էդուարդ Թոփչյանը վստահ է, որ Մալեր, Բրուկներ կամ Ռիխարդ Շտրաուս կատարելով՝ հնարավոր չէ սիմֆոնիկ նվագախմբի ֆինանսական ռեսուրսներն ապահովել: Որպես դասական երաժշտության մասին պետական հոգածության օրինակ՝ հաղորդման հյուրը բերում է Չինաստանը, որտեղ մեծ ներդրումներ են կատարվում մշակույթի մեջ:
Ֆիլհարմոնիկ նվագախմբի հետ համագործակցում և ելույթներ են ունենում աշխարհի լավագույն դիրիժորներն ու մենակատարները: Էդուարդ Թոփչյանը դա բացատրում է նվագախմբի արտիստների բարձր պրոֆեսիոնալիզմով, ինչպես նաև ստեղծագործական սկզբունքներով՝ այժմ աշխարհում «թրենդային» է դասական երաժշտության գունագեղ, էմոցիոնալ մեկնաբանությունը:
Նվագախմբի 100-ամյակի տոնակատարությունների շրջանակում Երևան է գալու չինացի աշխարհահռչակ դաշնակահարուհի Յուջա Վանգը:
Մանրամասները՝ տեսանյութում։
Արամ Աբրահամյան
