23.02.2026 | 23:30
Ադրբեջանը նույնպես հետաքրքրություն է հայտնել Եվրոպական խաղաղության գործիքակազմի շրջանակներում օգնություն ստանալու հարցում
Կեղծ դիպլոմով բժշկական գործունեության 7 դեպք է արձանագրվել. տեսչական մարմնի ղեկավար․ ՏԵՍԱՆՅՈՒԹ
10.01.2025 | 18:09
Կեղծ դիպլոմով բժշկական օգնություն և սպասարկում իրականացնելու 7 դեպք է արձանագրվել անցած տարվա ընթացքում։ Այս մասին իր ամփոփիչ ասուլիսում ասել է Առողջապահական և աշխատանքի տեսչական մարմնի ղեկավար Սլավիկ Սարգսյանը՝ հավելելով, որ մինչ այս, այդպիսի դեպքեր չեն եղել։
«Արձանագրված դեպքերը և տեղեկատվությունը փոխանցվել է համապատասխան մարմիններին։ 2024-ին 15 դեպք ենք արձանագրել չլիցենզավորված ծառայություններ իրականացնելու, խոսքը մերսման սրահների և կոսմետոլոգիական ծառայությունների մասին է»,- ասել է Սարգսյանը։
Տեսչական մարմնի ղեկավարը նշել է, որ 2024 թվականի ստուգումների արդյունքում կայացվել է ավելի քան 5 մլրդ դրամի տուգանքի 1934 որոշում։ Նա պարզաբանեց, որ անցած տարվա ընթացքում տնտեսվարող սուբյեկտներում իրականացվել է 850 պլանային ստուգում։
«350 նման ստուգումներ վերաբերել են աշխատանքային իրավունքների պահպանմանը, 226-ը՝ սանիտարահիգիենիկ նորմերին, 199-ը՝ դեղերի շրջանառության վերահսկողությանը և այլն»,- նշեց նա։
Սարգսյանի խոսքով՝ իրականացվել է նաև ևս 2949 չնախատեսված ստուգում, այդ թվում՝ դեղերի շրջանառության վերահսկողության ոլորտում (216 ստուգում), սանիտարահիգիենիկ ստանդարտների (657 ստուգում) և աշխատանքային տարածքում իրավունքների մասով (1413 ստուգում): Սարգսյանը հավելեց, որ 1200 դեպք է գրանցվել, երբ աշխատակիցներն աշխատել են առանց աշխատանքային պայմանագրի։
