10.01.2025 | 21:45
Փաշինյանի գլամուրային բլոգը` Ալիևի սպառնալիքների ֆոնին. ինչի է ձգտում ՀՀ վարչապետը. ՏԵՍԱՆՅՈՒԹ
ԱՄՆ-ի և Ֆրանսիայի զորքեր կարող են տեղակայվել Սիրիայում Թուրքիայի հետ սահմանին՝ մեղմելու Անկարայի և քրդական ուժերի միջև հակամարտությունը
Քաղաքականություն
10.01.2025 | 14:30
Քննարկումներ են ընթանում այն մասին՝ արդյո՞ք ԱՄՆ-ի և Ֆրանսիայի զորքերը կարող են ապահովել սահմանային գոտու անվտանգությունը Սիրիայի հյուսիսում Թուրքիայի և Արևմուտքի կողմից աջակցվող սիրիական քրդական ուժերի միջև հակամարտությունը մեղմելու ջանքերի շրջանակում։ Այս մասին հայտարարել է սիրիացի քուրդ բարձրաստիճան պաշտոնյան, գրում է Reuters-ը։
Անկարան նախազգուշացրել է, որ անդրսահմանային հարձակում կիրականացնի Սիրիայի հյուսիս-արևելքում քրդական YPG-ի զինյալների դեմ, եթե խմբավորումը չկատարի Թուրքիայի պահանջները: Անկարան կարծում է, որ YPG-ն գլխավորում է ԱՄՆ-ի դաշնակից Սիրիայի դեմոկրատական ուժերը (SDF), որին համարում է ահաբեկչական խմբավորում՝ կապված քրդական PKK-ի զինյալների հետ։
SDF-ը կարևոր դեր է խաղացել 2014-17 թվականներին Սիրիայում ԻԼԻՊ-ի զինյալներին հաղթելու գործում:
Ֆրանսիայի նախագահ Էմանուել Մակրոնն այս շաբաթվա սկզբին ասել էր, որ Փարիզը չի հրաժարվի SDF-ից։
«Միացյալ Նահանգները և Ֆրանսիան իսկապես կարող են ապահովել ամբողջ սահմանը: Մենք պատրաստ ենք, որ այս ռազմական կոալիցիան ստանձնի այդ պատասխանատվությունը։ Մենք խնդրում ենք ֆրանսիացիներին զորքեր մտցնել այս սահման՝ ապառազմականացված գոտին պաշտպանելու համար, օգնել մեզ պաշտպանել տարածաշրջանը և լավ հարաբերություններ հաստատել Թուրքիայի հետ»,- ասել է հյուսիսային տարածքում քրդական վարչակազմի արտաքին գործերի համանախագահ Իլհամ Ահմեդը, որը Սիրիայի կենտրոնական կառավարության վերահսկողությունից դուրս է։
Ո՛չ Ֆրանսիայի, ո՛չ Թուրքիայի արտաքին գործերի նախարարություններն անմիջապես չեն արձագանքել լրատվամիջոցի մեկնաբանությունների խնդրանքներին: ԱՄՆ Պետքարտուղարությունն էլ հասանելի չի եղել մեկնաբանությունների համար:
Անհասկանալի է, թե ինչպիսի ըմբռնում կլինի Թուրքիայի կողմից նման նախաձեռնության նկատմամբ՝ հաշվի առնելով, որ Անկարան տարիներ շարունակ հայտարարել է իր սահմանը Սիրիայից եկող սպառնալիքներից պաշտպանելու մասին և խոստացել ոչնչացնել YPG-ին:
«Երբ Ֆրանսիան համոզի Թուրքիային ընդունել իր ներկայությունը սահմանին, այն ժամանակ մենք կարող ենք սկսել խաղաղության գործընթացը։ Մենք հուսով ենք, որ ամեն ինչ կկարգավորվի առաջիկա շաբաթներին»,- ասել է Ահմեդը։
Հարցին ծանոթ աղբյուրը լրատվամիջոցին հայտնել է, որ հարցի շուրջ բանակցությունները շարունակվում են, սակայն հրաժարվել է ասել, թե որքանով են դրանք առաջ գնացել կամ իրատեսական։
Թարգմանությունը՝ Էմմա Չոբանյանի
