19.12.2025 | 13:13
ՄԱԿ-ի Գլխավոր վեհաժողովը թարմացրել է Ուկրաինայում ՌԴ-ի իրականացրած խախտումների վերաբերյալ բանաձևը. ինչպես է քվեարկել ՀՀ-ն
Հայաստանը հունվարին ռուսական հեռուստաալիքների վերաբերյալ առաջարկներ կուղարկի Ռուսաստան. ԲՏԱ նախարար․ ՏԵՍԱՆՅՈՒԹ
Քաղաքականություն
09.01.2025 | 17:00
Հայաստանը հանրային մուլտիպլեքսում ռուսական հեռուստաալիքների վերահեռարձակման վերաբերյալ իր առաջարկները ևս մեկ անգամ Ռուսաստանին կուղարկի այս տարվա հունվարին, այս մասին տարեկան ամփոփիչ ասուլիսի ժամանակ ասաց ՀՀ բարձր տեխնոլոգիական արդյունաբերության նախարար Մխիթար Հայրապետյանը՝ պատասխանելով Factor TV-ի հարցին՝ արդյո՞ք կառավարությունում ռուսական հեռուստաալիքները հանրային մուլտիպլեքսից հանելու քննարկումներ կա՞ն, թե՝ ոչ։
Նա նշեց, որ անցած տարի հայկական կողմն արդեն երկու անգամ ռուս գործընկերներին առաջարկներ է ուղարկել միջպետական համաձայնագրում փոփոխություններ կատարելու վերաբերյալ, սակայն պատասխան չի ստացել։
Նախարարը շեշտեց, որ տարբեր մակարդակներում քաղաքական շփումների ընթացքում հայկական կողմը հայտարարում է իր ակնկալիքների մասին, որոնք արդարացի է համարում: Մխիթարյանն արձանագրեց, որ համաձայնագիրն ունի որոշակի թերություններ, և Երևանը ցանկանում է բարելավել փաստաթուղթը կառուցողական փոխգործակցության մթնոլորտում:
«Արդեն տևական ժամանակ մենք խախտումներ չենք արձանագրել։ Ես չեմ կարող ասել, թե եթե խախտումներ արձանագրվեն, որքան կտրուկ կլինեն մեր քայլերը։ Մենք այս իմաստով բավարարված ենք, որ ոչ մի մեզ համար անընդունելի կոնտենտ չի մատուցվում հայաստանյան հեռուստադիտողին։ Բայց համարում ենք, քանի որ նաև ինստիտուցիոնալ լուծումների կողմնակից ենք, ցանկացած փաստաթուղթ, այդ թվում՝ միջպետական, կարող է ունենալ որոշակի բացեր։ Կարծում եմ՝ մենք չափազանց կառուցողական և ադեկվատ վարքագիծ ենք դրսևորում՝ առաջարկելով մի քանի փոփոխություններ, որոնք կլավարկեն փաստաթուղթը»,- նշեց նա։
