18.12.2025 | 19:39
Կայացել է ՀՀ-ԱՄՆ աշխատանքային խմբի անդրանիկ հանդիպումը
Մասկը դիտարկում է, թե ինչպես Մեծ Բրիտանիայի վարչապետին հեռացնի պաշտոնից․FT
Քաղաքականություն
09.01.2025 | 16:01
Ամերիկացի միլիարդատեր, գործարար Իլոն Մասկը դաշնակիցների հետ մասնավոր կերպով քննարկել է, թե ինչպես կարող է Քիր Սթարմերին հեռացնել Մեծ Բրիտանիայի վարչապետի պաշտոնից մինչև հաջորդ համընդհանուր ընտրությունները: Այս մասին գրում է Financial Times-ը՝ քաջատեղյակ աղբյուրներին վկայակոչելով։
Ըստ հրապարակման՝ Մասկը՝ աշխարհի ամենահարուստ մարդը և ԱՄՆ նորընտիր նախագահ Դոնալդ Թրամփի գլխավոր վստահելի անձը, պարզում է, թե ինչպես կարող են ինքը և իր աջ դաշնակիցներն ապակայունացնել Մեծ Բրիտանիայի լեյբորիստական կառավարությունը՝ այն ագրեսիվ գրառումներից բացի, որոնք նա հրապարակել է իր X սոցցանցում։
«Նրա տեսակետն այն է, որ արևմտյան քաղաքակրթությունը վտանգված է»,- ասել է իրազեկ աղբյուրներից մեկը:
Մասկն ուսումնասիրել է՝ արդյո՞ք կարող է ստանալ այլընտրանքային քաղաքական շարժումների աջակցությունը Մեծ Բրիտանիայում, մասնավորապես, Նայջել Ֆարաջի աջ պոպուլիստական Reform UK կուսակցության, որպեսզի տապալի Սթարմերին: Մասկը նաև փոխարինող է փնտրում Ֆարաջին որպես կուսակցության առաջնորդի։
Tesla-ի, SpaceX-ի և X-ի գործադիր տնօրեն Իլոն Մասկը վերջին վեց ամսվա ընթացքում մեծ հետաքրքրություն է ցուցաբերել բրիտանական քաղաքականության նկատմամբ և գնալով ավելի կոշտ քննադատության է ենթարկում Սթարմերի կառավարությանը: Անցած շաբաթ նա պահանջել էր նոր ազգային հետաքննություն սկսել պատմական գրումինգի դեպքերի վերաբերյալ, որոնք վերաբերում են աղջիկների սեռական շահագործմանը՝ հիմնականում բրիտանացի-պակիստանցի տղամարդկանց բանդաների կողմից Մեծ Բրիտանիայի մի քանի քաղաքներում։
Մասկը Սթարմերին, որը նախկինում ղեկավարում էր Թագավորական դատախազությունը և զբաղվում երեխաների սեռական բռնության հարցերով, մեղադրել է զոհերի և նրանց ծնողների դիմումներն անտեսելու մեջ:
Սթարմերը հունվարի 6-ին պատասխանել էր, որ «սուտ և ապատեղեկատվություն տարածողները» հետաքրքրված են ոչ թե հանցագործության զոհերով, այլ «իրենցով»:
Թարգմանությունը՝ Էմմա Չոբանյանի
