Իսրայելը պետք է պատրաստվի Թուրքիայի հետ հնարավոր պատերազմին․ իսրայելական կառավարական կոմիտե

Իսրայելը պետք է պատրաստվի Թուրքիայի հետ ուղիղ առճակատման։ Այս մասին ասվում է իսրայելական կառավարական Նագելի կոմիտեի՝ պաշտպանական բյուջեի և անվտանգության ռազմավարության վերաբերյալ վերջին զեկույցում, գրում է The Jerusalem Post-ը։

Կառավարության կողմից ստեղծված կոմիտեն նախազգուշացնում է, որ օսմանյան ժամանակաշրջանի ազդեցությունը վերականգնելու՝ Թուրքիայի հավակնությունները կարող են հանգեցնել Իսրայելի հետ լարվածության սրման, ինչը, հնարավոր է, վերածվի հակամարտության։ Զեկույցն ընդգծում է սիրիական խմբավորումների՝ Թուրքիայի հետ միավորվելու վտանգը՝ ստեղծելով նոր և հզոր սպառնալիք Իսրայելի անվտանգության համար:

«Սիրիայից եկող սպառնալիքը կարող է վերածվել նույնիսկ ավելի վտանգավոր բանի, քան իրանականը»,- ասվում է զեկույցում։

Իսրայելական պետական կառույցի այս գնահատականը հնչում է տարածաշրջանում Թուրքիայի նախագահ Ռեջեփ Թայիփ Էրդողանի ավելի հաստատակամ քաղաքականության ֆոնին, որը որոշ վերլուծաբաններ համարում են Իսրայելի շահերի հակառակորդ:

Հաղորդվում է, որ կոմիտեն իր առաջարկությունները ներկայացրել է Իսրայելի վարչապետ Բենիամին Նեթանյահուին, պաշտպանության նախարար Իսրայել Կացին և ֆինանսների նախարար Բեզալել Սմոտրիչին՝ ուրվագծելով առաջացող սպառնալիքներին դիմակայելու համապարփակ ռազմավարություն: Այն առաջարկում է առաջիկա հինգ տարիների ընթացքում պաշտպանական բյուջեն ավելացնել տարեկան մինչև 15 միլիարդով, որպեսզի Իսրայելի պաշտպանության ուժերը պատրաստ լինեն դիմակայել Թուրքիայի կողմից սպասվող մարտահրավերներին՝ տարածաշրջանային այլ սպառնալիքների հետ մեկտեղ:

«Մենք ականատես ենք լինում Մերձավոր Արևելքում հիմնարար փոփոխությունների։ Իրանը վաղուց է մեր ամենամեծ սպառնալիքը, սակայն ասպարեզ են դուրս գալիս նոր ուժեր, և մենք պետք է պատրաստ լինենք անսպասելիին։ Այս զեկույցը մեզ տրամադրում է ճանապարհային քարտեզ՝ ապահովելու Իսրայելի ապագան»,- հայտարարել է Բենիամին Նեթանյահուն:

Թուրքիայի հետ հնարավոր առճակատման նախապատրաստվելու համար կոմիտեն առաջարկել է նաև ընդլայնել սպառազինությունը՝ ձեռք բերել հավելյալ F-15 կործանիչներ, ինքնաթիռներ, անօդաչու թռչող սարքեր և արբանյակներ՝ Իսրայելի հեռահար հարվածային կարողություններն ուժեղացնելու համար, բարելավել ՀՕՊ համակարգերը՝ բազմաշերտ հակաօդային պաշտպանության կարողությունները, ներառյալ՝ Երկաթե գմբեթ, David’s Sling, Arrow համակարգերը և նոր գործարկվող Iron Beam լազերային պաշտպանության համակարգը, ուժեղացնել սահմանային անվտանգությունը՝ Հորդանանի հետ երկայնքով ամրացված անվտանգության պատնեշի կառուցում, որը կնշանակի զգալի փոփոխություն Իսրայելի պաշտպանական ռազմավարության մեջ՝ չնայած Հորդանանի հետ հնարավոր դիվանագիտական ​​հետևանքներին:

Թարգմանությունը՝ Էմմա Չոբանյանի