26.05.2026 | 11:49
Իրանի հարստացված ուրանը կոչնչացվի ԱՄՆ-ում, տեղում կամ «այլ ընդունելի վայրում». Թրամփ
Կոտայքի մարզում նոր հրշեջ-փրկարարական հենակետ է բացվել
Քաղաքականություն
30.12.2024 | 20:44
Կոտայքի մարզում նոր հրշեջ-փրկարարական հենակետ է բացվել։ Այս մասին տեղեկացնում են ՆԳՆ-ից։
«Համաձայն ՀՀ ՆԳՆ ՓԾ տնօրեն-ներքին գործերի նախարարի տեղակալի հրամանի՝ ՀՀ ՆԳՆ ՓԾ Կոտայքի ՄՓՎ ենթակա ստորաբաժանումներում նախատոնական և տոնական օրերին իրականացվում է ուժեղացված ծառայություն։ Բնակչության անվտանգությունն ապահովելու նպատակով՝ սպասարկման տարածքի առավել բանուկ հատվածներում, որտեղ առկա է զբոսաշրջիկների դինամիկ հոսք, պարբերաբար իրականացվում են շրջայցեր, անհրաժեշտության դեպքում սահմանվում է հերթապահություն, որպեսզի հնարավորինս արագ և արդյունավետ արձագանքվի հնարավոր վթարային ու արտակարգ պատահարների առաջացման դեպքում։
Այդ նպատակով Կոտայքի մարզի Ծաղկաձոր քաղաքում հիմնվել է հրշեջ-փրկարարական նոր հենակետ, որի առկայությունն ու հնարավոր դեպքերին արագ արձագանքումը կհանգեցնի ինչպես Ծաղկաձոր խոշորացված համայնքի բնակավայրերի բնակչության, այնպես էլ զբոսաշրջիկների անվտանգության ապահովման բարձրացմանը։
Դեկտեմբերի 30-ին Կոտայքի մարզային փրկարարական վարչության պետ, փ/ծ փոխգնդապետ Գ․ Սեդրակյանի գլխավորությամբ տեղի է ունեցել հենակետի պաշտոնական բացումը։ Հենակետում ծառայություն է իրականացնում Հրազդանի հրշեջ-փրկարարական ջոկատի անձնակազմը։ ՄՓՎ պետի կողմից իրականացվել է անձնակազմի հրահանգավորում, հենակետում հերթապահություն իրականացնող ծառայողներին տրվել են մի շարք հանձնարարականներ, մասնավորապես՝ ծառայությունն աչալուրջ և խստապահանջ կազմակերպելու, հնարավոր դեպքերին արագ և արդյունավետ արձագանքելու, տրանսպորտային միջոցների և գույք-սարքավորումների ճիշտ և խնամքով շահագործելու, ինչպես նաև անվտանգության կանոնները պահպանելու ուղղությամբ։
Նույն օրը փ/ծ փոխգնդապետ Գ․ Սեդրակյանն այցելել է նաև «Հրազդան ՋԷԿ»-ի հրշեջ-փրկարարական ջոկատ, որտեղ «Հրազդան ՋԷԿ» ԲԲԸ-ի կողմից իրականացվել էր ջոկատի շինության հիմնովին վերանորոգում։
ՄՓՎ պետի կողմից տրվել են կարգադրություններ՝ շինության բարեկարգ վիճակը պահպանելու, ինչպես նաև նախատոնական և տոնական օրերին ծառայությունն առավել զգոն կազմակերպելու ուղղությամբ։
Կոտայքի մարզում նոր հրշեջ-փրկարարական հենակետի բացումը և ուժեղացված ծառայությունը նպատակաուղղված են ինչպես բնակչության, այնպես էլ զբոսաշրջիկների անվտանգությունն ապահովելուն ու արագ արձագանքման հնարավորությունները բարելավելուն, ինչը կարևոր քայլ է արտակարգ իրավիճակների կանխարգելման և արագ արձագանքման համակարգի արդյունավետության բարձրացման համար։
Այսպիսի միջոցառումները կարևոր են հատկապես նման խոշորացված համայնքներում, որտեղ բնակչության և զբոսաշրջիկների անվտանգությունն առաջնային նշանակություն ունի, իսկ նոր հրշեջ-փրկարարական հենակետի բացումը նպաստում է ոչ միայն համարժեք ծառայության կազմակերպմանը, այլև արտակարգ իրավիճակներին արագ և արդյունավետ արձագանքմանը»,- ասված է հաղորդագրության մեջ։
