15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Կադիրովը պարգևատրել է իր զարմիկին, որն ադրբեջանական ինքնաթիռի կործանման օրը հայտնել է Չեչնիայի վրա բոլոր թիրախների ոչնչացման մասին
Քաղաքականություն
27.12.2024 | 14:13
Չեչնիայի ղեկավար Ռամզան Կադիրովը «Չեչնիայի Հանրապետությանը մատուցած ծառայությունների համար» մեդալով է պարգևատրել իր եղբորորդուն՝ Չեչնիայի անվտանգության խորհրդի քարտուղար Խամզաթ Կադիրովին, գրում է Агентство-ն։
Վերջինը նախօրեին Instagram-ում հայտնել էր Չեչնիայի երկնքում բոլոր անօդաչու թռչող սարքերի ոչնչացման մասին, իսկ առավոտյան Ակտաուում կործանվել է ադրբեջանական օդանավը, որը չէր կարողացել վայրէջք կատարել Գրոզնիում և, ըստ նախաքննության տվյալների, խոցվել էր ռուսական հրթիռից։
«Տեղեկությունն այն մասին, որ անօդաչուներն ինչ-որ օբյեկտի են հարվածել, ճիշտ չէ, ամեն ինչ խոցվել է»,- գրել է Խամզաթ Կադիրովը։
Նրա խոսքերը պաշտոնյայի միակ հայտարարությունն են, որ հաստատում են հանրապետության վրա անօդաչու թռչող սարքի հարձակման փաստը։ Պետական գերատեսչությունները և անվտանգության ուժերին առնչվող տելեգրամյան ալիքներն անտեսել են այդ փաստը:
Մինչդեռ, ըստ աղբյուրի, այս տեղեկությունը սկզբունքային նշանակություն ունի՝ հասկանալու համար, թե ինչ է պատահել «Ադրբեջանական ավիաուղիներ»-ի ինքնաթիռի հետ, երբ այն փորձել է վայրէջք կատարել Չեչնիայում։
Հետաքննության նախնական արդյունքների համաձայն, որոնք հրապարակել են միանգամից մի քանի միջազգային լրատվամիջոցներ (այդ թվում՝ Euronews-ը և Reuters-ը), ինքնաթիռի վրա ռուսական հրթիռ է արձակվել, որն էլ հանգեցրել է Ակտաուում ինքնաթիռի կործանման։
Թարգմանությունը՝ Էմմա Չոբանյանի
