Ողջունելի է, մենք կողմ ենք կոռուպցիայի կանխարգելմանը․ Կենտրոնի թաղապետը՝ ձերբակալությունների մասին. ՏԵՍԱՆՅՈՒԹ

«Ես կարծում եմ, որ շատ  լավ գործընթաց է, մենք բոլորս կողմ ենք կոռուպցիայի կանխարգելմանն ու վերացմանը։ Կարծում եմ՝ նման գործերի բացահայտումը միայն ողոջունելի է»,- Factor TV-ի հետ զրույցում ասաց Կենտրոն վարչական շրջանի ղեկավար Պետրոս Պետոյանը՝ անդրադառնալով թաղապետարանում ձերբակալություններին։

«Կարծում եմ՝ շատ ճիշտ պրոցես է, ես որ հիմա Կենտրոն վարչական շրջանի ղեկավարը չլինեի  և տանը նստած լինեի, շատ կուրախանայի, որ նման դեպքերը  բացահայտվում են»,- ասաց թաղապետը։

Հիշեցնենք՝ Կենտրոնի թաղապետարանը ուշադրության կենտրոնում էր հայտնվել ավելի քան մեկ ամիս առաջ, երբ իրավապահ մարմինները գործողություններ էին իրականացրել աշխատակազմի առևտրի և սպասարկումների բաժնում։ Factor․am-ի տեղեկություններով՝ խուզարկության արդյունքում ձերբակալվել էին բաժնի պետ Արսեն Աղաբեկյանը, նրա տեղակալը, նույն բաժնի ևս մեկ աշխատակից և մեկ քաղաքացի։ Հակակոռուպցիոն կոմիտեում քննվող այդ գործը վերաբերում է ենթադրյալ կաշառքի և պաշտոնեական լիազորությունները չարաշահելու կամ անցնելու դեպքին։

Factor․am-ի աղբյուրի փոխանցմամբ՝ նրանք կասկածվում են հանրային սննդի օբյեկտներից լիցենզիայի պետական տուրքի գումարներն առձեռն հավաքագրելու և Կենտրոն վարչական շրջանում սուրճի ապարատներ տեղադրելու թույլտվություններ տալու համար։ Այս ձերբակալություններին հաջորդեց մեկ այլ ձերբակալություն՝ կոմունալ տնտեսության և բազմաբնակարան շենքերի կառավարման մարմինների հետ աշխատանքների կազմակերպման բաժնից։ Հակակոռուպցիոն կոմիտեի լրատվականից Factor.am-ին հաստատել էին, որ Կենտրոնի թաղապետարանից պաշտոնատար անձ է ձերբակալվել, և նրա նկատմամբ խափանման միջոց է ընտրվել կալանքը։ Ձերբակալությունը տեղի է ունեցել կոմիտեում քննվող քրեական վարույթի շրջանակում, որը վերաբերում է կաշառք տալուն և ստանալուն։ Կոմիտեից նշել էին, որ այդ գործով կան այլ մեղադրյալներ, որոնց մի մասը կալանավորված է, թե քանիսը՝ չէին մանրամասնել։ Մեր տեղեկություններով՝ աշխատակիցը աչք է փակել ապօրինի շինությունների և փողոցներում տեղադրված կանգնակների վրա։

Մանրամասները՝ տեսանյութում։

Արփի Հակոբյան