30.04.2026 | 17:27
Ընտրակաշառքի գործով երեկ ձերբակալված 5 անձից 3-ի նկատմամբ խափանման միջոց է ընտրվել կալանավորումը
Թրամփը կարող է Իսրայելին առաջարկել ռմբակոծել Իրանի միջուկային օբյեկտները. WSJ
Քաղաքականություն
13.12.2024 | 14:51
ԱՄՆ նորընտիր նախագահ Դոնալդ Թրամփի թիմն առաջարկել է Իրանին զսպելու ծրագիր, որը կներառի Իսրայելի օդուժի հարվածները Թեհրանի միջուկային օբյեկտներին, գրում է The Wall Street Journal-ը՝ հղում անելով իր աղբյուրներին։
Այս ծրագրի շրջանակում ԱՄՆ-ը պետք է Իսրայելին փոխանցի «ժամանակակից զենքեր», որոնք կարող են շարքից հանել իրանական միջուկային օբյեկտները, գրում է պարբերականը։ Դոնալդ Թրամփի անցումային թիմի անդամները դիտարկում են երկու տարբերակ՝ արձագանքելու Իրանի կողմից միջուկային զենքի պոտենցիալ զարգացմանը, հայտնում են WSJ-ի աղբյուրները։
Առաջինը ներառում է ռազմական ճնշում՝ «ավելի շատ» ամերիկյան զորքեր և տեխնիկա ուղարկելով Մերձավոր Արևելք, զենք վաճառելով Իսրայելին հարվածների համար և խստացնելով Իրանի դեմ պատժամիջոցները, պարբերականին հայտնել են ծրագրին ծանոթ երկու աղբյուրներ:
Երկրորդ տարբերակը «ռազմական ուժի սպառնալիքն» է՝ զուգորդված պատժամիջոցների ավելացման հետ։
Թրամփն Իսրայելի վարչապետ Բենիամին Նեթանյահուի հետ հեռախոսազրույցի ժամանակ ասել է, որ անհանգստացած է «իրանական միջուկային բեկումով», գրում է պարբերականը։ ԱՄՆ նորընտիր նախագահը, սակայն, «ցանկանում է իրականացնել մի ծրագիր, որը չի հանգեցնի նոր պատերազմի բռնկման, հատկապես՝ այնպիսի պատերազմի, որը կարող է ներգրավել ԱՄՆ զինված ուժերին»։
WSJ-ի տվյալներով՝ Իրանն այժմ ունի բավականաչափ բարձր հարստացված ուրան՝ մի քանի օրում չորս միջուկային ռումբ ստեղծելու համար։
Թարգմանությունը՝ Տաթև Ֆռանգյանի
