30.04.2026 | 22:19
Հայաստանի պետական սիմֆոնիկ նվագախմբի և Լա Սկալայի օպերային թատրոնի համագործակցությունը՝ Օմանում
Հարավային Կորեայի նախագահը խոստացել է «պայքարել մինչև վերջ»
Քաղաքականություն
12.12.2024 | 15:20
Հարավային Կորեայի նախագահ Յուն Սոկ Յոլը, մեկնաբանելով ապստամբության և դավաճանության կասկածանքով իր դեմ սկսված հետաքննությունը, ասել է, որ մտադիր է «պայքարել մինչև վերջ»։ Պաշտոնական հեռուստաուղերձում նա մերժել է իր կամավոր հրաժարականը և բացատրել, որ անցած շաբաթ հայտարարել է ռազմական դրություն՝ «ազգը պաշտպանելու և կառավարության գործերը կարգավորելու համար», փոխանցում է Yonhap-ը։
Ընդդիմությունը ծրագրում է իմփիչմենթի նոր առաջարկը քվեարկության դնել դեկտեմբերի 14-ին։ Անցյալ շաբաթ, իմփիչմենթի առաջին քվեարկությունից առաջ, պետության ղեկավարը հայտարարել է, որ իր պաշտոնավարման ապագայի վերաբերյալ որոշումը վստահում է իշխող կուսակցությանը։ Կուսակցության ղեկավարությունն իր հերթին հանդես է եկել նախագահի «վերահսկվող վաղաժամկետ հրաժարականի» օգտին։
Դեկտեմբերի 3-ին Յուն Սոկ Յոլը ռազմական դրություն է մտցրել՝ բացատրելով, որ դա անհրաժեշտ է՝ կանխելու խորհրդարանը վերահսկող «հյուսիսկորեամետ» ընդդիմության՝ սահմանադրական կարգը խախտելու փորձերը։ Վեց ժամ անց ռազմական դրությունը հանվել է, քանի որ խորհրդարանը դեմ է քվեարկել դրան:
Հետաքննություն է անցկացվում նաև պաշտպանության նախկին նախարար Կիմ Յոնգ Հյունի դեմ, որը, ենթադրաբար, առաջարկել է Յունին ռազմական դրություն մտցնել: Դեկտեմբերի 11-ի գիշերը քննչական մեկուսարանում Հյունն ինքնասպանության փորձ է արել։
Թարգմանությունը՝ Տաթև Ֆռանգյանի
