«Աշխարհում մնացել է երկու առաջնորդ՝ միայն ես ու Պուտինը»․ Էրդողան

Թուրքիայի նախագահ Ռեջեփ Թայիփ Էրդողանը Գազիանթեփի Շահինբեյ Ազգային գրադարանում «Երիտասարդների հետ հանդիպման» ժամանակ մի շարք քաղաքական հարցերի է անդրադարձել։ Անադոլուի փոխանցմամբ՝ իր ելույթում Էրդողանը խոսել է համաշխարհային քաղաքականության, հատկապես՝ ԱՄՆ-ի ընտրությունների և Սիրիայում տիրող իրավիճակի մասին։

Թուրքիայի նախագահը նաև հայտարարել է, որ «այս պահին աշխարհում մնացել է երկու առաջնորդ՝ միայն ինքն ու ՌԴ նախագահ  Վլադիմիր Պուտինը»։ Էրդողանը այսպես է խոսել  այն բանից հետո, երբ մի երիտասարդ հարցրել է, թե «ինչի՞ն է նա պարտական ​​դիվանագիտական ​​հարաբերություններում իր հաջողությունների համար»։

«Կարևոր է օտարերկրյա առաջնորդների դեմ օգտագործվող լեզուն։ Բացի հայտարարություններից, շատ կարևոր է շարունակել նրանց հետ երկխոսության մեխանիզմը։ Մենք դրանք անվանում ենք դիվանագիտական ​​հարձակումներ։ Ներկայումս աշխարհում մնացել են երկու (փորձառու) առաջնորդներ։ Ես և Վլադիմիր Պուտինը: Ես դա ասում եմ ոչ այն պատճառով, որ ես եմ։ Բայց իմ պաշտոնավարման ժամկետը 22 տարի է։ Գրեթե նույնը պարոն Պուտինի մասին։ Մյուսները հեռացել են: Եվ մենք ցանկանում ենք, որ մեր երկխոսությունը շարունակվի: Մերկելը տեղ ուներ Գերմանիայի քաղաքականության մեջ: Մերկելի հեռանալուց հետո Գերմանիայում քաղաքականությունն ավարտվեց»,-ասել է Էրդողանը։

Նա նաև նշել է, որ աշխարհը անսովոր շրջան է ապրում։

«Հիմա Ամերիկայում իշխանության է եկել Թրամփի կառավարությունը։ Տեսնենք, թե ինչպես է ԱՄՆ-ում ձևավորվում Թրամփի գլխավորած նոր վարչակազմը։ Ընդհանուր առմամբ, աշխարհը շարժվում է դեպի բոլորովին այլ ապագա: Հետևաբար, առաջիկա 2-3 ամիսները մեզ համար շատ կարեւոր են»,- ասել է Թուրքիայի նախագահը։

Թարգմանությունը՝ Էմմա Չոբանյան