16.11.2024 | 15:35
Վարչապետ Փաշինյանը շնորհավորել է Ռոբերտ Ամիրխանյանին ծննդյան 85-ամյակի կապակցությամբ
Մանվել Գրիգորյանի պաշտպանները կմիջնորդեն «ողջամիտ գրավի դիմաց» նրան ազատ արձակել
Հասարակություն
20.09.2018 | 13:16
ԱԺ նախկին պատգամավոր, գեներալ Մանվել Գրիգորյանը հիվանդանոցից դուրս է գրվել, գտնվում է «Երևան կենտրոն» ՔԿՀ-ի մեկուսարանում։ Այս մասին տեղեկացանք գեներալի փաստաբան Արսեն Մկրտչյանից, վերջինս այլ մանրամասներ չցանկացավ հայտնել, պատճառաբանելով, որ ցանկացած գրվող բան վնասում է Գրիգորյանին։
Այնուամենայնիվ, Մանվել Գրիգորյանի շահերի պաշտպան, փաստաբան Լևոն Բաղդասարյանից հաջողվեց գեներալի առողջական վիճակի մասին մանրամասներ ճշտել։ Փաստաբանն ասաց, որ հիմա վիճակը բավականին վատ է․ «Բազմիցս կրկնել եմ, հիմա էլ փաստում եմ, որ վերջինիս նկատմամբ կիրառվում է դասական խոշտանգում։ Անձն ունի հիվանդություններ, որոնք անհամատեղելի են կալանքի հետ, նրան, այնուամենայնիվ, պահում են մեկուսարանում»։
Բաղդասարյանից հետաքրքրվեցինք՝ արդյոք հիվանդանոցում գտնվելու ժամանակ և դրանից հետո, Գրիգորյանի առողջական վիճակում դրական փոփոխություն չի՞ եղել․ «Փոփոխությունը բացասական առումով է գնացել։ Միայն շաքարի քանակն ավելի է բարձրացել»։
Մանվել Գրիգորյանին կալանքի տակ պահելը փաստաբանը որակեց անհիմն, պնդեց՝ ներկայացված ապացույցները վերացական են։ Նա նաև տեղեկացրեց, որ շուտով կլրանա Գրիգորյանին ևս երկու ամսով կալանքի տակ պահելու որոշման ժամկետը և պաշտպանական կողմը պատրաստվում է միջնորդություն ներկայացնել գեներալին գրավի դիմաց ազատ արձակելու համար, գրավի չափ իրենք չեն ներկայացրել:
«Գրավի ողջամիտ չափ մենք պատրաստ ենք վճարել»,- շեշտեց փաստաբանը։
Հիշեցնենք, որ Մանվել Գրիգորյանին մեղադրանք էր առաջադրվել ՀՀ քրեական օրենսգրքի 235 հոդվածի 1-ին և 2-րդ կետերով (ապօրինի կերպով զենք ռազմամթերք ձեռք բերելը կրել կամ փոխադրելը, որը կատարվել է մի խումբ անձանց կողմից նախնական համաձայնությամբ) ինչպես նաև ՀՀ ՔՕ 179 հոդվածի 3-րդ մասի 1-ին կետով (մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակություն):
