Քաղաքականություն
02.12.2024 | 10:57
Սիրիացի ապստամբները գրավել են Հալեպը և շարունակում են իրենց առաջխաղացումը դեպի հարավ։ Ռուսական ինքնաթիռները շարունակում են հարվածել Ասադի ռեժիմի կողմից չվերահսկվող տարածքները, գրում է BBC-ի ռուսական ծառայությունը։
Ընդդիմադիր ուժերը գտնվում են Սիրիայի չորրորդ ամենամեծ քաղաքի՝ Համայի մոտ գտնվող գյուղերում, հայտնել է Մեծ Բրիտանիայում տեղակայված Մարդու իրավունքների սիրիական դիտորդական կենտրոնը (SOHR):
SOHR-ի դիտորդները հայտնել են, որ Բաշար ալ-Ասադի կառավարությունը վերջին մի քանի ժամվա ընթացքում զգալի ուժեր է ուղարկել և պաշտպանական գիծ է ստեղծում Թայբաթ ալ-Իմամ քաղաքում և հյուսիսային Համա նահանգի Խաթաբ և Սուրան գյուղերում, ինչպես նաև նահանգի հյուսիս-արևմուտքում գտնվող ալ-Սուքայլաբիա և Մահրադա քրիստոնեաբնակ քաղաքներում։
Ինչպես AFP-ին հայտնել է SOHR-ը, կառավարական զորքերը դուրս են եկել Հալեպից: Սիրիայի երկրորդ ամենամեծ քաղաքը գրեթե ամբողջությամբ վերահսկվում է սիրիական ընդդիմության՝ «Հայաթ Թահրիր ալ-Շամ» շարժման և թուրքամետ կազմավորումների կողմից։ Բացառություն են կազմում Հալեպի շրջանները, որոնք գտնվում են քրդական ուժերի վերահսկողության տակ։
Իդլիբն ու Համան գտնվում են Հալեպի հարավում։ Ընդդիմադիր ուժերը վերահսկողություն են պահպանում հյուսիսարևմտյան Իդլիբ քաղաքի և շրջակայքի մեծ մասի նկատմամբ:
Սիրիայի պաշտպանության նախարարությունը հայտարարել է, որ կառավարությունը պատրաստվում է հակահարձակում սկսել ապստամբ ուժերի դեմ: Նախարարության ֆեյսբուքյան էջում հրապարակված հաղորդագրության մեջ ասվում է, որ ռուսական և սիրիական ռազմական ինքնաթիռները նոր ավիահարվածներ են հասցրել ընդդիմության զինյալներին հյուսիսային Իդլիբ և Համա նահանգներում։
Ըստ SOHR-ի՝ ռուսական ավիացիան հինգ անընդմեջ հարված է հասցրել Իդլիբի շրջաններից մեկում գտնվող փախստականների ճամբարին, ինչի հետևանքով առնվազն ութ մարդ է զոհվել։
Ավելի ուշ SOHR-ը հաղորդել է, որ ռուսական ինքնաթիռները չորս ավիահարված են հասցրել Հալեպի համալսարանական հիվանդանոցին, ինչի հետևանքով զոհվել է հինգ մարդ, այդ թվում՝ խաղաղ բնակիչներ:
Սիրիայում պատերազմող կողմերի հաշտեցման ռուսական կենտրոնի երեկոյան զեկույցում հիվանդանոցի վրա հարձակման մասին խոսք չկա: Նշվում է, որ վերջին 24 ժամվա ընթացքում հրթիռներով և ռումբերով հարվածներ են հասցվել Հալեպ, Համա և Իդլիբ նահանգներին։
2019 թվականին «New York Times»-ը փաստագրել է ռուսական թիրախավորված օդային հարվածները Սիրիայում չորս հիվանդանոցների վրա, որոնց ճշգրիտ կոորդինատները նրան տրվել էին նախապես՝ հատուկ նման հարձակումներից խուսափելու համար։
Հալեպը սիրիական ապստամբների առանցքային հենակետն էր մինչև 2016 թվականը, երբ այն ընկավ կառավարական ուժերի կողմից, որոնք աջակցում էին ռուսական ծանր օդուժին: Սիրիացի ապստամբները (ի տարբերություն, օրինակ, ուկրաինական կանոնավոր բանակի) երբեք չեն ունեցել հակաօդային պաշտպանություն, ինչը թույլ է տվել Ռուսաստանի օդատիեզերական ուժերին չվախենալ, որ իրենց ինքնաթիռները կխոցվեն։
BBC-ն նշում է, որ պարզ չէ, թե արդյոք ապստամբները կկարողանան պահպանել սիրիական տարածքները, որոնք նրանք այժմ գրավել են, Ասադի ուժերի և նրա դաշնակիցների կողմից օդային տարածքի վերահսկողության պայմաններում:
Թարգմանությունը՝ Տաթև Ֆռանգյանի
