27.11.2024 | 22:49
Երևանի քաղաքապետն այցելել է Լոս Անջելեսի տրանսպորտի կառավարման կենտրոն
Հայկ Մարությանը մասնակցել է Անդրանիկ Թևանյանի նախաձեռնած ստորագրահավաքին
Քաղաքականություն
27.11.2024 | 18:15
Երևանի նախկին քաղաքապետ, ավագանու «Ազգային առաջընթաց» խմբակցության նախկին անդամ Հայկ Մարությանը մասնակցել է «Մայր Հայաստան» շարժման առաջնորդ Անդրանիկ Թևանյանի նախաձեռնած ստորագրահավաքին։ Ֆեյսբուքյան էջում այս մասին տեղեկացրել է Երևանի ավագանու «Մայր Հայաստան» խմբակցության նախկին անդամ Սոնա Աղեկյանը՝ հավելելով, որ ինքն էլ մասնակցել է տրանսպորտի թանկացման դեմ Մարությանի նախաձեռնած ստորագրահավաքին։
«Նոր ուժ» կուսակցության նախագահ Հայկ Մարությանը նոյեմբերի 3-ին հայտարարեց, որ հունվարի 1-ից նախատեսվող տրանսպորտի թանկացման դեմ ստորագրահավաք են սկսում։
«Մեր խմբերը կշրջեն քաղաքում և ստորագրահավաք կանեն այդ որոշման դեմ։ Արդյունքում ավագանու որոշման նախագծով կստիպենք հրաժարվել թանկացման չարդարացված մտադրությունից»,- գրել էր Մարությանն իր ֆեյսբուքյան էջում։
«Ազգային առաջընթաց» խմբակցությունն արդեն իսկ տրանսպորտի թանկացման որոշման մեջ փոփոխություններ անելու վերաբերյալ նախագիծ է ներկայացրել քաղաքապետարան։ Այն պետք է ընդգրկվի ավագանու նիստի օրակարգում և ներկայացվի ավագանու անդամների քննարկմանը։ Հայկ Մարությանը հայտարարել է, որ արդեն 50,000 ստորագրություն է հավաքվել։
«Մայր Հայաստան» խմբակցությունը մեկ անգամ արդեն տրանսպորտի սակագների վերաբերյալ նախագիծ ներկայացրել է ավագանուն, որը սակայն մերժվել է։ Այս անգամ նախագիծը քաղաքապետարան կներկայացվի հավաքած ստորագրություններով։
Արփի Հակոբյան
